Comments Add Comment

बालबच्चालाई सिकाउनुपर्छ पारिवारिक संस्कार

हरेक घर-परिवारको आफ्नै संस्कार हुन्छ । चालचलन हुन्छ । पुस्तौदेखि अंगाल्दै आएको यी संस्कारले परिवारलाई सही मार्गदर्शन दिइरहेको हुन्छ । अतः यस्तो संस्कार हामीले आफ्नो बच्चाबाटै सिकाउन सुरु गर्नुपर्छ ।

पारिवारिक संस्कारले बालबच्चालाई सही बाटोमा हिँड्न प्रेरित गर्छ । उनीहरुमा खराब प्रवृत्तिको विकास हुन पाउँदैन । जब बच्चाले उचित संस्कार पाउँदैन, उनीहरु पथभ्रष्ट हुने भय रहन्छ । त्यसैले घर परिवारले बच्चालाई सही संस्कार दिनुपर्छ ।

बच्चालाई संस्कार सिकाउने पहिलो पाठशाला भनेको आमाबाबु नै हुन् । यदि आमाबाबुमा असल संस्कार छ भने बच्चाहरुले पनि त्यही सिक्छन् । त्यसैले आफ्ना बच्चाहरु संस्कारी भएनन् भनेर गुनासो गर्नुअगाडि आमाबाबुले आफ्नो आचरणमा ध्यान दिनु जरुरी हुन्छ ।

बच्चालाई हामीले यस्तो कुरामा अभ्यस्त गर्नुपर्छ कि, जसले उनीहरुलाई अनुशासित जीवनयापन गराउन मद्दत गर्छ । यसमा उनीहरुको उठ्ने, सुत्ने, खाने, बस्ने, पढ्ने, खेल्ने सबै तालिका निश्चित हुनुपर्छ । सही समयमा सुत्ने, सही समयमा खाने, सही समयमा खेल्ने, सही समयमा पढ्ने कुरामा अभ्यस्त गराउनुपर्छ ।

त्यससँगै कसरी खाने, कसरी खेल्ने, कसरी पढ्ने भन्ने कुरा पनि सिकाउनुपर्छ । शिष्टचारपूर्वक खान, कुरा गर्न, बस्न, व्यवहार गर्न सिकाउनुपर्छ । यसले उनीहरुलाई शिष्ट र सभ्य बनाउँछ ।

यसरी संस्कार सिकाउनका लागि बच्चालाई उपदेश दिने होइन, उदाहरण बन्नुपर्छ । घरपरिवार नै संयमित र अनुशासित छ भने त्यसको प्रभाव बच्चामा पर्छ । आमाबुवालाई देखेर उनीहरुले पनि सोहि संस्कारलाई पच्छ्याउँछन् । त्यसैले यसका लागि रोल मोडलको रुपमा बुवाआमाले नै भूमिका खेल्नुपर्छ ।

संस्कार सिकाउने वा अनुशासित बनाउने भन्दैमा उनीहरुमाथि कडाई गर्ने होइन । यसले गलत नतिजा दिन सक्छ । हामीलाई स्कुलमा अनुशासित बनाउने नाममा जुन कडाई गरिन्छ, त्यसले स्कुलप्रति नै वितृष्णा जगाउँछ । ठिक यसैगरी अभिभावकले पनि अनुशासनको नाममा अनावश्यक कडाई गर्दा त्यो पत्युत्पादक बन्न सक्छ ।

संस्कार सिकाउने, अनुशासन सिकाउने भन्ने कुरा पढाएर, घोकाए, कराएर, तर्साएर, उपदेश दिएर हुने कुरा होइन । उनीहरुलाई विस्तारै त्यस्तो कुरामा अभ्यस्त गराउनुपर्छ ।

केही आमाबाबु आफ्ना बच्चालाई कडा अनुशासनमा राख्नका लागि नियमले बाँध्न चाहन्छन् । तर, यसबाट बच्चा झन् उद्दण्ड हुन्छन् । बच्चाहरुसँग साथीजस्तो व्यवहार गर्नुपर्छ । विनम्रता दर्शाउनुपर्छ । बच्चाले बदमाशी गरेको खण्डमा गाली गर्ने, पिट्ने होइन, प्रेमपूर्वक सम्झाउनुपर्छ । यसबाट बच्चाहरुमा सकारात्मक भावनाको सञ्चार हुन्छ ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment