९ चैत, काकडभिट्टा । पूर्वी नेपालको मुख्य प्रवेशद्वार मेचीको काँकडभिट्टाबाट नेपाल प्रवेश गर्ने व्यक्तिहरुको संख्या ह्वात्तै घटेको छ । हिजो शनिबार १३ हजार ५ सय ८५ जना नेपाल भित्रिएकोमा आइतबार यो संख्या २ सय हाराहारीमा झरेको हो ।
मेची नगरपालिकाको तथ्यांकअनुसार ९ दिनमा साढे ८४ हजार जना नेपाल भित्रिएका छन् । नगरपालिकाले काँकडभिट्टामा गत चैत १ गतेदेखि हेल्थ डेस्कको स्थापना गरी नाका बाटबाट आवागमन गर्नेहरुको स्वास्थ्य परीक्षण गर्नुका साथै लगत राख्न थालेको थियो ।
मेयर विमल आर्चायले यस अवधिमा ८४ हजार ८ सय ३२ जना नेपाल प्रवेश गरेको जानकारी दिए । यसमा महिलाको संख्या २७ हजार २९० रहेको छ । यो अवधिमा काँकडभिट्टा नाकाबाट ८१ हजार जना भारततर्फ गएका छन् ।
इलाका प्रहरी कार्यालय काँकडभिट्टाका प्रहरी नायव उपरीक्षक राजेन्द्र पोखरेलका अनुसार आइतबार अपरान्हसम्म २ सय १३ जना मात्र सो नाका भएर नेपाल प्रवेश गरेका छन् ।
‘भारतीय भूमिबाट नेपाल प्रवेश गर्नेको संख्या आइतबारदेखि ह्वातै घटेको छ,’ प्रहरी नायव उपरीक्षक पोखरेलले भने ।
विश्वभर फैलिरहेको कोरोना भाइरस (कोभिड– १९) को सङक्रमण रोकथामका लागि भारतको पश्चिम बंगाल सरकारले नेपालसँग जोडिएको काँकडभिट्टाबाहेक सबै नाका एक साताअघि बन्द गरेको छ ।
अघिल्लो शनिबार इलामको पशुपतिनगर नाका बन्द गरेकोमा आइतबारदेखि काँकडभिट्टाबाहेक सबै नाका बन्द गरेको हो । भारतको विहार सरकारले भने अहिलेसम्म कुनै नाका बन्द गरेको छैन । झापा जिल्लासँग भारतको पश्चिम बङ्गाल र विहार राज्य जोडिएका छन् ।
बंगालसँग काँकडभिट्टा र भद्रपुर नाका जोडिन्छ भने विहारसँग भद्रपुरसहित केचना, कुमरखोद, गौरीगञ्ज नाका जोडिएका छन् । बंगालले काँकडभिट्टाबाट स्वास्थ्य परीक्षण गरेर मात्र प्रवेश दिइरहेको छ ।
२८ जना फर्काइयो
यसैबीच, काँकडभिट्टा नाकाबाट नेपाल प्रवेश गर्न खोज्ने २८ जनालाई सिमानाकाबाट भारत फर्काइएको छ । भारतका विभिन्न स्थानबाट नेपाल प्रवेशका लागि आएका उनीहरुको स्वास्थ्य परिक्षण गर्ने क्रममा ज्वरो देखिएपछि उनीहरुलाई नाकाबाटै भारततर्फ फर्काइएको इलाका प्रहरी कार्यालय काँकडभिट्टा प्रहरी नायव उपरीक्षक पोखरलले बताए ।
‘नाकामा नियमित स्वास्थ्य जाँचका क्रममा भारतबाट नेपाल आएका २८ जनामा ज्वरो देखियो,’ प्रहरी नायव उपरीक्षक पोखरेलले भने, ‘त्यसैले उनीहरुलाई भारत नै फिर्ता पठाएका छौ ।’