इँटा उद्योगीमाथि आक्रमण गर्नेलाई कारबाही गर्न प्रभु साहको माग

१३ चैत, काठमाडौं । सत्तारुढ नेपाल कम्युनिस्ट पार्टी (नेकपा)का प्रदेश नम्बर २ का अध्यक्ष प्रभु साहले इँटा उद्योग सञ्चालकमाथि भएको आक्रमणका दोषीहरुलाई कारबाही गर्न माग गरेका छन् ।

बिहीबार विज्ञप्ति निकालेर उनले रौतहटको गरुडा नगरपालिका अमरपट्टीस्थित ‘दाइभाइ इँटा उद्योग’का सञ्चालक रामबाबु चौधरीका भाइ मुकेशकुमार चौधरीमाथि सांघातिक हमला भएको उल्लेख गरेका छन् ।

मुकेशकुमार नेकपाका रौतहट जिल्ला सदस्य रामबाबु चौधरीका भाइ हुन् ।

‘इटा उद्योगमा यही चैत २ गते विहान सांघातिक हमला भयो,’ प्रभु साहले निकालेको विज्ञप्तिमा भनिएको छ, ‘दाजुभाई इटा उद्योगमा दर्जनौं संख्यामा रहेको अपराधिक समूहले विहान ९ बजे मुकेश कुमार चौधरीमाथि सांघातिक आक्रमण गरी गम्भी घाइते बनाएको छ ।’

नेता साहकाअनुसार उक्त घटनामा १२ भन्दा बढी कामदारहरु घाइते भएका छन् भने मुकेश चौधरी काठमाडौंमा उपचारत छन् ।

‘घटनाको निष्पक्ष छानबिन गरी अपराधीहरुलाई कडाभन्दा कडा कानुनी कारबाही गर्न गृह प्रशासनसँग अनुरोध छ,’ साहले विज्ञप्तिमा लेखेका छन् ।