२७ चैत, काठमाडौं । बहराइनमा कोरोना भाइरस संक्रमित नेपालीहरुको संख्या २२ पुगेको छ । बुधबार थप १० जनामा संक्रमण पुष्टि भएपछि संक्रमित नेपालीहरुको संख्या २२ पुगेको मनामास्थित नेपाली दूतावासले जनाएको छ ।
केही समय अघि सल्माबादस्थित एक क्याम्पमा एक जना विदेशी नागरिकमा कोरोना संक्रमण देखिएपछि त्यहाँ कार्यरत चार सय जनालाई क्वारेन्टाइनमा राखेर स्वास्थ्य परीक्षण गरिएको थियो । सोही क्रममा थप १० जना नेपालीहरुमा कोरोना संक्रमण पुष्टि भएको दूतावासले जनाएको छ ।
दूतावासका अनुसार बुधबार दिउँसो दुई बजेसम्म बहराइनमा ५२ हजार तीन सय ५१ जनामा कोरोना संक्रमण भए-नभएको परीक्षण गरिएको छ ।
बहराइनमा कुल संक्रमितको संख्या तीन सय ४९ छ भने पाँच जनाको मृत्यु भएको छ । संक्रमितमध्ये तीन जनाको अवस्था गम्भीर छ । चार सय ६७ जना उपचारपछि निको भएर घर फर्किसकेका छन् ।
यसैबीच बहराइनले अवैधानिक रुपमा विनाकागजात कार्यरत कामदारहरुका लागि वैधानिक हुन वा बहराइन छाड्न ३१ डिसेम्बर २०२०सम्मको समय दिएको दूतावासले जनाएको छ ।
हेर्नुस् बहराइनस्थित नेपाली दूतावासले निकालेको पछिल्लो विज्ञप्ति
