२ वैशाख, काठमाडौं । निजी वायुसेवा कम्पनी बुद्ध एयरले मंगलबार बंगलादेशका लागि चार्टर्ड उडान गरेको छ । तीन बजे बंगलादेशको ढाकाका लागि उडेको जहाज आजै काठमाडौं र्फकने कम्पनीले जनाएको छ ।
नेपालमा रहेका १३ जना बंगलादेशी नागरिक बोकेर जहाज ढाका उडेको हो । नेपालमा रहेका बंगलादेशी नागरिकलाई स्वदेश फर्काउन दूतावासको पहलमा बुद्ध एयरको जहाज चार्टर्ड गरिएको हो ।
मंगलबार नै नेपाल एयरलाइन्सको जहाज नयाँ दिल्ली उडेको छ । विदेशी दूतावासहरुले यात्रु आफैले भाडा तिर्ने शर्तसहित धमाधम आफ्ना नागरिक फिर्ता लगिरहेका छन् ।
नेपालमा १८ बैशाखसम्म राष्ट्रिय-अन्तर्राष्ट्रिय उडान बन्द भएका छन् । यसले गर्दा नेपालमा रोकिएका विदेशी नागरिक समस्यामा थिए ।