८ जेठ, काठमाडौं । गोरखाको भीमसेनथापा गाउँपालिका–७ ले वडाभित्र पाहुना लाग्ने, तास खेल्नेलगायतका गतिविधिमा रोक लगाएको छ ।
कोरोना भाइरस (कोभिड–१९) को सम्भावित संक्रमणबाट जोगिन गाउँपालिकाको वडा नं. ७ बोर्लाङमा जेठ ८ गतेदेखि लागू हुनेगरी पाहुना लाग्न नपाइने नियम बनाइएको हो ।
वडा कार्यालयले बिहीबार एक सूचना जारी गर्दै आफन्तलाई नबोलाउन र आफू पनि कतै नजान वडाबासीलाई अनुरोध गरेको छ । वडाको अनुरोधलाई उल्लंघन गरी पाहुना लाग्न आएमा त्यस्ता व्यक्तिलाई वडामा अवस्थित क्वारेन्टाइनमा राखिने वडाध्यक्ष नारायण श्रेष्ठले जानकारी दिए ।
त्यसैगरी, वडाभित्र जमघट गर्न, भोजभतेर गर्न, जुवातास खेल्नेलगायतका गतिविधि नगर्न पनि वडाले अनुरोध गरेको छ ।
