बजेट उत्कृष्ट पनि होइन, निम्छरो पनि छैन : अर्थविद् अधिकारी

अनिश्चितताको समयमा आएको बजेट हो। यसलाई मैले औसत रुपमा लिएको छु। यो उत्कृष्ट बजेट पनि होइन, निम्छरो पनि होइन।नीति तथा कार्यक्रममा धेरै छरिएको थियो । बजेट त्यस्तो आएन । बजेटको उद्देश्य र प्राथमिकता ठिक छन् ।

ती उद्देश्य र प्राथमिकतालाई ध्यान दिएर ल्याएको बजेटले आर्थिक वृद्धिको लक्ष्य भने हासिल गर्न गाह्रो छ । बजेटको आकार घटेको छ । बजेटको नौ खर्ब ४८ अर्ब ९४ करोड रुपैयाँ त चालु खर्चमै जान्छ । पुनर्उत्थानमा धेरै जान सक्दैन । यसले धेरै सुधार गर्न सक्दैन । रोजगारीको लक्ष्य पूरा गर्न चुनौती देखेको छु ।

२२, २३ लाखलाई रोजगारी दिनु त्यति सहज छैन । स्वास्थ्य क्षेत्रका लागि ल्याएका कार्यक्रमहरू ठिक छन्। जीवन जोगाउन खोजेको छ, त्यो राम्रो हो। उत्पादन बढाउन र निजी क्षेत्रलाई खुसी बनाउन सक्दैन। आयकरमा छुट दिएको छ त्यो राम्रो कुरा हो । तर, यत्तिकै दरमा लगानी बढाउन सकिँदैन ।

उत्पादन बढाउन धेरै स्थान दिनुपर्ने त्यो भएन । धेरै कुराहरू गतसालकै विषयहरू पूरा गर्ने भनिएको छ। स्थानीय विकास साझेदारी कार्यक्रमको बजेट कटौती गर्ने हिम्मत गर्नुपर्थ्यो, थोरै भए पनि कटौती गर्‍यो यो राम्रै हो ।

विकास खर्च बढाउने क्षमता छैन । खर्च बढाउने रणानीति यस्तो बनाउन सकिन्छ भन्ने स्पष्ट भन्न सकेन। स्थानीय तहको क्षमता अभिवृद्धि गरेर काम गराउने कार्यक्रमहरू ल्याउन सकेन । ठूला राष्ट्रिय गौरवका आयोजनाहरूको हालत खराब छ ।

यसपालिको बजेटले पनि खासै राम्रो हुँदैन । यो बजेटबाट ठूलो अपेक्षा नगरौं। तर, नकारात्मक भने लिनुहुँदैन, समग्रमा बचाउन खोज्ने किसिमको बजेट आएको छ ।