२०७७ जेठ १८ गते १८:०४ 
१८ जेठ काठमाडौं । सशस्त्र प्रहरी बल (एपीएफ)मा रहेका खेलाडीलाई पनि कोरोनाभाइरस कोभिड-१९ रोकथाम तथा नियन्त्रणका लागि सीमा क्षेत्रमा परिचालन गरिने भएको छ ।
सुरक्षा अंकको रुपमा रहेका एपीएफमा अहिले झण्डै साढे तीन सयको हाराहारीमा राष्ट्रिय अन्तर्राष्ट्रिय खेलाडी छन् । केही खेलाडीले १३औं सागमा नेपालका लागि पदकसमेत जितेका थिए ।
खेलाडी भएपनि उनीहरुले संगठनको तालिम पनि गरेका हुन्छन् ।
त्यसैले राष्ट्रको लागि आइपरेको बेला खेलाडीलाई पनि परिचालन गर्न लागिएको एपीएफ स्रोतले अनलाइनखबरलाई जनाएको छ । ‘उनीहरु पनि प्रहरी नै हुन् । यहाँ आबद्ध भएका सबैले तालिम गरेका छन् । त्यसैले खेलाडी पनि यसमा जानु स्वभाविक हो,’ स्रोतले भन्यो ।
भारतसँग सीमा नाका कडाईको लागि खेलाडीसहित २०० जनाको टोलीलाई प्रदेश २ मा परिचालन गर्न लागिएको हो ।
एपीएफका खेलाडीहरुलाई हलचोकस्थित मुख्यालयमा ड्युटिमा राखिएको थियो र उनीहरुलाई स्ट्यानबाई पोजिसनमा राखिएको थियो ।
यसअघि पनि खेलाडीलाई उपत्यका बाहिर पठाउने तयारी भए पनि खेलाडीलाई मुख्यालयमा मात्रै ड्युटिमा खटाइएको हो ।
प्रतिक्रिया 4