२६ जेठ, जनकपुरधाम । प्रदेश २ को अस्थायी राजधानी जनकपुरधाम सामान्यतर्फ उन्मुख बन्दै गएको छ । यहाँका प्रायः सबै पसल खुलेका छन् । मोटरसाइकल चल्नु सामान्य भइसकेको छ भने सिटी रिक्सा, चार पांग्रे सवारीसाधन पनि चल्न थालेका छन् ।
कोरोना संक्रमण फैलिन नदिन लगाइएको लकडाउन विस्तारै खुकुलो बन्दै गएको छ यहाँ । सिनेमा घर, सैलुन, जिमखानाबाहेक हरेक प्रकारका व्यापार, व्यवसाय शुरु भएको छ । सोमबार जनकपुरधाम बजारका अधिकांस पसल निर्वाध संचालन भएको पाइयो भने मोटरसाइकल, तीन पांग्रे सिटी रिक्सा र चार पांग्रे जीपहरु गुडेको देखियो ।
यहाँका अधिकांश बैंकमा अत्यधिक भिड देखियो भने सिटी रिक्सामा कोचाकोच गरेर यात्रु चढेका छन् ।
गत शुक्रबार स्थानीय प्रशासन र व्यापारीबीच बिहानदेखि मध्यान्ह १२ बजेसम्म बजार खोल्ने सहमति भएको थियो । यो सहमतिसँगै बजारमा चहलपहल बढेको छ । स्थानीय प्रशासनले व्यापार, व्यवसायको समय निर्धारण गरे पनि त्यो बाहेकको समयमा पनि यहाँका बजार खुला रहेका हुन्छन् ।
जनकपुरधामको भानु चोक, शिवचोक, जानकी चोक, भ्रमरपुरा चोकसहितका ठाउँमा सोमबार उल्लेख्य भिड देखापरेको छ । भिड देखिएका ठाउँहरुमा कुनै किसिमको दूरी मेन्टेन गरेको देखिएको छैन ।
