२०७७ असार ३ गते २०:०६ 
३ असार, काठमाडौं । युरोपियन च्याम्पियन्स लिग २०१९-२० को क्वार्टरफाइनलदेखिका सबै खेल पोर्चुगलमा हुने भएको छ ।
युईएफएको बुधबार भएको बैठकले च्याम्पियन्स लिगका क्वार्टरफाइनलदेखिका खेल पोर्चुगलको लिस्वनमा आयोजना गर्ने जनाएको हो । च्याम्पियन्स लिगको फाइनल अगष्ट २३ मा हुनेछ ।
यसैगरी युरोपा लिगको क्वार्टरफाइनलदेखिको खेलहरु जर्मनीमा हुने भएको छ ।
अन्तिम ८ देखि भने सबै चरणमा एक खेल मात्र हुने भएको छ । यसअघि सेमिफाइनलसम्म होम एण्ड अवे गरी दुई लेगको खेल हुँदै आएको थियो । च्याम्पियन्स लिगको क्वार्टरफाइनलदेखिको खेलहरु अगष्ट १२ देखि २३ सम्म हुन्छ । अन्तिम १६ का खेल भने अगष्ट ७ र ८ मा हुनेछ ।
च्याम्पियनस लिग अन्तर्गत अन्तिम १६ को बाँकी रहेका केही खेलको दोस्रो लेग भने पुरानै तालिकाअनुसार घरेलु मैदानमै हुने युईएफएले जनाएको छ ।
जसमा म्यानचेष्टर सिटी र रियल मड्रिड, बार्सिलोना र नापोली, बायर्न म्युनिख र चेल्सी तथा युभेन्ट्स र लियोनबीचको खेलको दोस्रो लेग बाँकी छ ।
यस्तै युरोपा लिग अन्तर्गत अन्तिम १६ को बाँकी रहेका खेलमध्ये २ खेलको दुई लेग नै हुने र ६ खेल घरेलु टोलीको मैदानमै हुने भएको छ ।
युरोपा लिगका खेलहरु अगष्ट १० देखि २१ सम्म हुनेछ ।
युईएफएका अध्यक्ष अलेक्जान्डर कफेरिनले फेरि फुटबल सुरु गर्ने खबरले खुशी भएको बताएका छन् ।
प्रतिक्रिया 4