१७ असार, काठमाडौं । बुधबार पनि सेयर कारोबारमा ‘पोजिटिभ सर्किट’ लागेको छ । बुधबार ६ प्रतिशतले बजार बढेर ‘पोजिटिभ सर्किट’ लागेपछि आजको कारोबार स्थगित गरिएको छ ।
कोरोना त्रासकै बीच सोमबारदेखि खुलेको बजार पहिलो दिन दोहोरो अंकले घटेको थियो भने मंगलबार पनि पोजिटिभ सर्किट लागेको थियो ।
बुधबार बजार खुलेको एक घण्टा २३ मिनेटमा सेयर कारोबार मापक नेप्से परिसूचक ७५ दशमलव ७७ अंकले बढेर एक हजार ३३६ दशमलव ५३ अंकमा पुगेको छ । कारोबार खुलेको पहिलो आधा घण्टा पनि नहुँदै चार प्रतिशतले बढेपछि सर्किट ब्रेक लाग्यो ।
दोस्रो पटक ५ प्रतिशतले बढेपछि ४० मिनेट रोकिएको कारोबार ६ प्रतिशतले बढेपछि बुधबारका लागि कारोबार नै स्थगित गरिएको नेपाल स्टक एक्सचेञ्जले जनाएको छ ।
बुधबार सबै उपसमूहहरूमा हरियाली हुँदा हाेटल भने राताम्मे देखिएकाे छ । हाेटल ५ दशमलव १५ अंकले घटेकाे छ ।
३ हजार ८ सय ९० कारोबारबाट ११ लाख १ हजार २ कित्ता सेयर किनबेच भएका छन् । जसअनुसार कारोबार रकम ४० करोड ७३ लाख ५२ हजार २ सय ४७ रुपैयाँको सेयर कारोबार भएको छ ।