२४ असार, काठमाडौं । इटालियन सिरी एमा लिग लिडर युभेन्ट्समाथि एसी मिलानले शानदार जित हासिल गरेको छ । दुई गोलले पछि परेको अवस्थामा मिलानले दोस्रो हाफमा ४ गोल गर्दै शानदार जित हासिल गरेको हो । मिलानले युभेन्ट्सलाई ४-२ ले पराजित गर्दै ३ अंक जोडेको हो ।
उता दोस्रो स्थानको लाजियो पनि लेसेसँग पराजित भएको छ । जसले गर्दा युभेन्ट्सले लाजियोसँग ७ अंकको अग्रता भने कायमै गरेको छ ।
युभेन्ट्स र मिलानबीचको खेलमा सबै ६ गोल नै दोस्रो हाफमा भएको थियो । खेलको ४७औं मिनेटमा एड्रियोन राविओट र ५३औं नेटमा क्रिस्टियानो रोनाल्डोले गोल गरेपछि युभेन्ट्सले २-० को अग्रता बनाएको थियो । तर अग्रता कायम राख्न सकेन ।
६२औं मिनेटमा ज्लाटन इब्राहिमोभिचले पेनाल्टीमार्फत गोल गर्दै मिलानलाई खेलमा फर्काउने प्रयास गरे । ६६औं मिनेटमा फ्रांन्क केसी र ६७औं मिनेटमा राफेल लिएओले गोल गरेपछि मिलानले ३-२ को अग्रता बनायो । ८०औं मिनेटमा एन्टे रेविकले गोल गर्दै मिलानलाई ४-२ को जित दिलाए ।
जितपछि एसी मिलान ३१ खेलबाट ४९ अंक जोड्दै पाँचौ स्थानमा उक्लेको छ र युरोपा लिगको सम्भावना कायम राखेको छ । एक खेल कम खेलेको रोमा र पोलीको समान ४८ अंक छ । पराजित युभेन्ट्सल ३१ खेलबाट ७५ अंकसहित शीर्ष स्थानमै आसिन छ ।
लेसेसँग पराजित लाजियो ६८ अंकसहित दोस्रो स्थानमा छ ।
