१२ साउन, काठमाडौं । रमेश सिलवाल दोस्रो पटक राष्ट्रिय खेलकुद परिषद राखेपको सदस्य सचिव नियुक्त भएका छन् । निवर्तमान सदस्य सचिवसमेत रहेका सिलवाल लगातार दुई कार्यकाल सदस्य सचिव बन्ने पहिलो व्यक्ति बनेका छन् ।
सोमबार बसेको मन्त्रिपरिषद बैठकले सिलवालई राखेपको सदस्य सचिवमा नियुक्त गरेको हो । सिलवाल अबको चार वर्षका लागि सदस्य सचिव रहनेछन् ।
२०७६ असार २३ गते राखेपको १८ औं सदस्यसचिव नियुक्त भएका सिलवाल नयाँ खेलकुद ऐन कार्यान्वयनमा आएपछि गत असार १७ गते पदमुक्त भएका थिए ।
त्यसपछि नयाँ सदस्यसचिव खोजीका लागि युवा तथा खेलकुद मन्त्रालयले सदस्य सचिव चयनका लागि मन्त्रालयको सचिव रामप्रसाद थपलियाको संयोजकत्वमा सिफारिस समिति गठन गरेको थियो ।
उक्त समितिले राखेप सदस्य सचिव खुल्ला प्रतिस्पर्धाबाट छनोट गर्न भन्दै आवेदन माग गरेको थियो । त्यसमा सिलवालले पनि आवेदन दिए । सिफारिस समितिले सिलवाल, नेकपा केन्द्रीय सदस्य लिलबहादुर थापा मगर र भलिबलका पूर्वखेलाडी अन्जु श्रेष्ठमध्येबाट सदस्य सचिव नियुक्त गर्न मन्त्रिपरिषदमा सिफारिस गरेको थियो ।
समितिले सिफारिस गरेकामध्ये मन्त्रिपरिषदले सिलवाललाई सदस्य सचिवमा नियुक्त गरेको युवा तथा खेलकुद मन्त्रालय स्रोतले जनाएको छ ।
सिलवालले १३ औं दक्षिण एसियाली खेलकुद सफल पारेको जस लिए पनि उनको कार्यबाट धेरै पदाधिकारी कर्मचारी सन्तुष्ट भने थिएनन् ।
सदस्य सचिव चयनपछि अब राखेप बोर्डमा सदस्यहरुको नियुक्ति प्रकिया पनि शुरु हुनेछ । नयाँ ऐन अनुसार राखेपको बोर्डमा अब ३७ सदस्यीय हुनेछ । जसको अध्यक्षमा युवा तथा खेलकुद मन्त्री रहनेछन् ।
नयाँ ऐन अनुसार अब सदस्य सचिवको एकल अधिकार ७ सदस्यीय कार्यसमितिमा बाँडिनेछ । उक्त कार्यकारी समितिको संयोजक सदस्य सचिव नै रहनेछन् भने सदस्यमा युवा तथा खेलकुद मन्त्रालयको खेलकुख महाशाखा प्रमुख सदस्यको रुपमा रहनेछन् ।
राखेप बोर्ड सदस्यमध्ये खेलकुद मन्त्री र सदस्य सचिवले दुई-दुई जना मनोनित गर्नेछन् । राखेपको प्रशासन विभाग प्रमुख भने उक्त समितिको सचिवको रुपमा रहनेछन् ।
यसअघि रुक्मशमसेर राणा र जीवनराम श्रेष्ठ पनि दुई कार्यकाल राखेपको सदस्य सचिव बनेका थिए । राणा २०५० देखि ५२ सम्म र २०५४ देखि ५५ सम्म सदस्य सचिव बनेका थिए ।
यस्तै जीवनराम श्रेष्ठ २०५३ देखि ५४ सम्म र २०६३ देखि २०६६ सम्म राखेपको सदस्य सचिव बनेका थिए ।
