१ भदौ, काठमाडौं । स्वास्थ्य तथा जनसंख्या मन्त्रालयले नारायणी अस्पतालको मेडिकल सुपरिटेन्डेन परिवर्तन गरेको छ। मन्त्रालयले आइतबार मन्त्रिस्तरीय निर्णय गर्दै नारायणी अस्पतालको मेसुको जिम्मेवारी डा सञ्जय ठाकुरलाई दिएको छ।
उनी यसअघि वीर अस्पतालमा कार्यरत थिए । अहिलेसम्म नारायणीका मेसु रहेका डा मदनकुमार उपाध्यायलाई मन्त्रालय फिर्ता बोलाइएको छ।
पछिल्लो समय वीरगञ्जमा कोरोनाको हटस्पट बन्दै गएको छ। अस्पतालका चिकित्सक तथा स्वास्थ्यकर्मी समेत संक्रमित हुन थालेपछि सेवा सञ्चालन गर्नसमेत गाह्रो भएको छ।
केही दिनअघि स्थानीय बताउने अराजक तत्वले अस्पतालमा पसी तोडफोड गर्नुका साथै डाक्टरमाथि समेत आक्रमणको प्रयास गरेका थिए । मेसु डा उपाध्यायलाई कालोमोसो लगाउने प्रयाससमेत गरेका थिए ।
मन्त्रालयका सहसचिव रघुराम बिष्टले वीरगञ्जको पछिल्लो अवस्था र विद्यमान परिस्थितिलाई हेरेर उपयुक्त निर्णय लिइएको बताए । उनले डा उपध्यायलाई अहिले मन्त्रालयमा काजमा ल्याइएको प्रतिक्रिया दिए ।
