१ चैत, काठमाडौं । इटालीले सेप्टेम्बरको अन्तिमसम्ममा मुलुकका ८० प्रतिशत नागरिकलाई कोरोना भाइरस (कोभिड–१९) विरुद्धको खोप लगाउने योजना बनाएको छ । इटालीमा कोरोना खोप कार्यक्रम निकै सुस्त चलिरहेको भन्दै आलोचना भइरहेको अवस्थामा इटालीले शनिबार यस्तो योजना सार्वजनिक गरेको हो ।
इटालीले पूर्ण क्षमतामा दैनिक पाँच लाख डोज कोरोना खोप दिने लक्ष्य रहेको बताएको छ । कोरोनाको कारण इटालीमा अहिलेसम्म एक लाख एक हजारभन्दा धेरै मानिसको मृत्यु भइसकेको छ ।
इटालीमा अहिलेसम्म १९ लाख ५० हजार अर्थात तीन दशमलव ८ प्रतिशत मानिसले मात्र कोरोनाको दुवै डोज खोप लिएका छन् । इटालीले आगामी दिनमा मुलुकमा आउने कोरोना खोपको संख्या पनि बढ्ने अनुमान गरेको छ ।
इटालीमा करिब पाँच करोड १० लाख मानिस कोरोना खोप लगाउन योग्य मानिएका छन् । उनीहरुमध्ये ६० प्रतिशतलाई जुलाईको अन्तिमसम्ममा कोरोना खोप पुर्याउने इटालीको लक्ष्य छ ।
-एजेन्सीहरुको सहयोगमा
