१२ चैत, जनकपुरधाम । महोत्तरीको पिपरा गाउँपालिका-५, सहोडवाका ६५ वर्षीय मुसाफिर झा र उनकी पत्नी ६० वर्षीया गीतादेवी १० फागुनको साँझ कान्छी बुहारी उषा झासँगै खाना खाएर सुतेका थिए ।
भोलिपल्ट बिहान उषा उठ्दा उनको कोठा बाहिरबाट बन्द गरिएको थियो । नजिकैको घरमा बस्ने जेठानी अंशुले ढोका खोलिदिइन् । सासूससुरा घरमा थिएनन्, कोठा पनि खुलै थिए । अंशुले सोचिन्, ‘अरुवेला बिहानै उठेर तोरी उखेल्न जानुहुन्थ्यो, त्यतै जानुभयो होला ।’
उषासँग गफिंदै अंशु ससुरा मुसाफिरको कोठामा पुग्दा ओछ्यान देखिनन् । रगत पानीले पखालेको जस्तो लागेपछि उनले प्रहरीलाई खबर गरिन् । प्रहरीले एउटै घरमा सुत्ने हुनाले कान्छी बुहारीमाथि अनुसन्धान गर्यो, तर शंका गर्ने ठाउँ नै भेट्टाएन । झा दम्पतीको पनि अत्तोपत्तो थिएन ।
एक महिनापछि बिहीबार झा दम्पतीको शव पिपरा-२ मा गाडिएको अवस्थामा भेटिएको छ । शवलाई गलाउन नुनको पनि प्रयोग गरिएको छ ।
प्रहरीले जग्गा बिक्री गर्न नमानेकै कारण झा दम्पतीको हत्या भएको निष्कर्ष निकालेको छ ।
जब रामबाबुको घरमा रगतको टाटा देखियो
मुसाफिर मालपोतका अवकाशप्राप्त सुब्बा थिए । त्यसैले रिसइबी हुनसक्ने आशंकामा प्रहरीले अनुसन्धान गरिरहेको थियो । त्यसक्रममा मुसाफिरलाई छिमेकमा बस्ने हरेन्द्र ठाकुरले जग्गा बिक्री गर्न दबाब दिने गरेको सूचना पायो ।
जग्गा जमिनको कारोबार गर्ने ठाकुरका साझेदार रामबाबु यादवको घर नजिकै थियो, उनलाई केही जानकारी हुनसक्ने आधारमा प्रहरी गयो । उनको घरबाहिर रगतको टाटा जस्तो देखिएपछि प्रहरीले थप सर्च अपरेशन चलायो र यादवसहित उनका छोराहरु २६ वर्षीय सुरेन्द्र यादव र कान्छो छोरा २४ वर्षीय राजेन्द्र यादवलाई नियन्त्रणमा लियो ।
बयानका क्रममा उनीहरुले त्यो रंग भएको बताए । तर विधि विज्ञान प्रयोगशालामा भएको परीक्षणले त्यो मानव रगत भएको पुष्टि गरपेछि अनुसन्धान रामबाबुमाथि केन्द्रित भएको अनुसन्धानमा खटिएका एक अधिकृत बताउँछन् ।
उनीमाथि अनुसन्धान केन्द्रित भएपछि प्रहरीले जग्गाका मुख्य मालिक भारतीय नागरिक रहेका जग्गा व्यवसायी हरेन्द्र ठाकुरको कल डिटेल रेकर्ड (सीडीआर) र लोकेशनको विश्लेषण गर्यो । त्यसक्रममा ठाकुर १० फागुनमा काठमाडौंबाट जनकपुरधाम आएर भोलिपल्ट फर्किएको देखियो । प्रहरीले ठाकुरलाई पनि काठमाडौंबाट पक्राउ गरेर महोत्तरी पुर्यायो, तर बयानमा उनले काठमाडौंबाट जनकपुर पुगेको स्वीकार गरेनन् ।
‘पोलिग्राफ शाखामा लगेर बयानको सत्यता परीक्षण गर्दा उनले ९९ प्रतिशत झूटाे बोलेको देखियो’, प्रदेश प्रहरी प्रमुख धिरजप्रताप सिंह भन्छन्, ‘यसले उनीहरुको संलग्नता हुनसक्ने आशंकालाई थप बल पुर्याएको थियो ।’
अनुसन्धान जारी रहेका वेला हरेन्द्रले भने आफूलाई फसाउन खोजिएको दाबी विभिन्न व्यक्तिमार्फत सार्वजनिक गराएको प्रहरी अधिकृतहरु बताउँछन् । त्यसपछि केन्द्रीय अनुसन्धान ब्युरो (सीआईबी) को टोली पनि बोलाएर अनुसन्धान थालिएको प्रहरी अधिकृतहरु बताउँछन् ।
ब्युरोले एक जना इन्स्पेक्टरको टोली अनुसन्धानमा खटाएको थियो । सीआईबीले पनि जिल्ला र प्रदेश प्रहरी कार्यालयकै टोलीको अनुसन्धानलाई सदर गर्यो तर, झा दम्पतीको अवस्था अज्ञात रह्यो ।
अनि, भेटियो शव
पक्राउ परेकाहरुले अभियोग स्वीकार गरेका थिएनन्, तर उनीहरुको संलग्नता देखिएपछि महोत्तरी प्रहरीले पत्रकार सम्मेलन गरी चारै जनालाई सार्वजनिक गर्याे । ‘रामबाबुको घरमा रगतको टाटा भेटिनु, रिसइबी पनि हुनु र प्राविधिक विश्लेषणले पनि घटनामा चार जनाको संलग्नता देखिएको छ’, एसपी दिनेश आचार्यले भनेका थिए ।
झा दम्पतीको हत्या गरेर शव गाडेको वा पोखरीमा गह्रौं वस्तुले थिचेर राखेको हुनसक्ने प्रहरीको आशंका थियो । ‘हामीले महोत्तरी र धनुषाका ४२ वटा पोखरीमा खर्च गरेका थियाैं भने केही पोखरीको पानी निकालिएको थियो’ सिंहले सुनाए, ‘खोजीमा र्याफ्टिङ बोट पनि प्रयोग गर्याैं।’
शंकास्पद ठाउँमा खोजीकै क्रममा प्रहरीको टोली बिहीबार झा दम्पतीको घरबाट दुई किलोमिटर पश्चिम-दक्षिणको पिपरा-२ मा पुगेको थियो ।
बगरमा खोस्रिएको देखिएपछि खनेर हेर्दा दम्पतीको शव भेटिएको डीआईजी सिंहले बताए। ‘शवको अवस्था हेर्दा अपहरणपछि तत्कालै हत्या गरेर गाडिएको जस्तो देखिएको छ’ उनले भने, ‘झा दम्पतीको शव छोरा मनिषकुमारले कपडा र पोतेका आधारमा सनाखत गरेका छन् ।’
जग्गा बिक्री गर्न नमान्दा हत्या
प्रहरीका अनुसार हरेन्द्र ठाकुरले प्लटिङ गर्ने तयारीसहित झा दम्पतीको १४ कट्ठा जग्गा खरिद गर्ने प्रयास गरेका थिए । ठाकुरले आँखा लगाएको जग्गा बिक्री गर्ने विषयमा झा पत्नी गीतादेवीको असहमति थियो ।
पतिलाई पनि जग्गा बेच्न त्यति इच्छा थिएन । अनुसन्धानमा संलग्न एक अधिकृतका अनुसार ठाकुरको नाममा अगाडि र अन्तिममा पनि जग्गा थियो । बीचको जग्गा बिक्री गरिदिन उनीहरुले डेढ वर्षदेखि आग्रह गरेका थिए । केही सीप नलागेपछि उनीहरुले धम्की दिएको छिमेकीहरुले बताएका छन् ।
वडा नं. ५ का वडाध्यक्ष शम्भुप्रसाद यादव पनि झा दम्पती हराएपछि छिमेकीहरुले जग्गा विवादबारे बताएको सुनाउँछन् । झा दम्पतीले जग्गा बिक्री नगरेकै कारण अपहरणपछि हत्या गरिएको देखिएको प्रदेश प्रहरी प्रमुख सिंह बताउँछन् ।
छिमेकमा विवाह उत्सव, झाको घरमा अपहरण
झा दम्पती बेपत्ता भएको दिन उनको छिमेकमा विवाह उत्सव चलिरहेको थियो । बिहेमा चर्को स्वरमा गीत बजिरहेका वेला बुबाआमालाई के भयो केही थाहा नपाएको बुहारी उषा झाको भनाइ छ। ‘बिहान ३ः१५ बजेतिर उठ्दा गेट बाहिरबाट लागेको पाएँ, सासूले सुनुन् भनेर कराएँ पनि’ उनले अनलाइनखबरसँग बताइन्, ‘केही नबोलेपछि कान कमजोर भएकाले सुन्नु भएन होला भन्ने ठानेर आफ्नैै कोठातिर गएर सुतें।’
भोलिपल्ट हेर्दा अपहरणकारीले घरको मिटरबक्सको स्वीच नै बन्द गरिदिएको पाइएको उनले सुनाइन् ।
सासूससुराको शव फेला परेपछि अहिले परिवारमा सन्नाटा छाएको छ । जेठी बुहारी अंशु भन्छिन्, ‘सासू-ससुराको यस्तो हालत गर्ने व्यक्तिलाई पनि कडाभन्दा कडा कारबाही हुनुपर्छ ।’
