१९ चैत, काठमाडौं । एसियाली–ओसनिया जुडो च्याम्पियनसिपमा सहभागी हुन चार खेलाडीसहित सात सदस्यीय नेपाली जुडो टोली शुक्रबार किर्गिस्तानको बिस्केक प्रस्थान गर्दैछ ।
अप्रिल ४ देखि १० तारिखसम्म हुने प्रतियोगितामा एक पुरुष र तीन महिला खेलाडीले नेपालको चुनौती प्रस्तुत गर्नेछन् । पुरुष ६६ केजीमुनि इन्द्रबहादुर श्रेष्ठले प्रतिस्पर्धा गर्नेछन् । महिला ४८ केजीमुनि सोनिया भट्ट, ५७ केजीमुनि देविका खड्का र ७० केजीमुनि पूनम श्रेष्ठले भाग लिनेछन् । चारै खेलाडी नेपालमा भएको १३ औं दक्षिण एसियाली खेलकुद (साग)का पदक विजेता हुन् । देविका र पूनमले १३ औं सागका स्वर्ण विजेता हुन् । इन्द्रले रजत तथा सोनियाले कास्य जितेका थिए ।
ओलम्पिक ¥याङकिङको रुपमा समेत रहेको प्रतियोगितामा ३१ राष्ट्रका १२३ पुरुष र ९५ जना महिला खेलाडीले प्रतिस्पर्धा गर्ने नेपाल जुडो संघले जनाएको छ ।
टोलीको प्रशिक्षकमा ओलम्पियन ऋषिराम प्रधान रहेका छन् । जुडो संघका महासचिवसमेत रहेका धर्मकुमार श्रेष्ठले प्रतियोगितामा निर्णायक भूमिका निर्वाह गर्नेछन् । खेलकुद निर्देशक सुप्रसिद्ध ताम्राकार पनि टोलीसँगै किर्गिस्तान जाँदैछन् ।
टोलीलाई सफलताको शुभकामना दिँदै राष्ट्रिय खेलकुद परिषद्का सदस्य–सचिव रमेशकुमार सिलवालले बिहीबार एक कार्यक्रमकाबीच बिदाइ गरे ।
अप्रिल ३ मा हुने जुडो युनियन अफ एसिया (जेयूए)को कार्यकारी समितिको बैठक र जेयूए जोन बैठक तथा अप्रिल ४ मा हुने जेयूए कंग्रेसमा भाग लिन जुडो संघका अध्यक्ष दीपकहर्ष बज्राचार्य बिस्केक पुगिसकेका छन् । महासचिव श्रेष्ठ पनि जेयूए जोन बैठकमा सहभागी हुने बताइएको छ ।
