निर्माता भुषण कुमार र अहमेद खानले नायिका श्रद्धा कपुरलाई चलचित्र ‘चालबाज’मा दोहोरो भूमिकाका लागि अनुवन्धित गरेका छन् । यो चलचित्रलाई टी–सिरिज र डल इन्टरटेन्मेन्टले संयुक्त रुपमा निर्माण गर्नेछ । श्रद्धाले पहिलो पटक चलचित्रको पर्दामा दोहोरो भूमिका निर्वाह गर्न लागेकी हुन् ।
पंकज पारासरको निर्देशनमा बन्ने यो चलचित्रलाई लिएर श्रद्धा उत्साहित छिन् । पंकजले सन् १९८९ मा नायिका श्रीदेवीलाई मुख्य भूमिकामा राखेर ‘चालबाज’कै निर्देशन गरेका थिए ।
श्रद्धाले भारतीय मिडियासँग कुरा गर्दै भनिन्–‘यो चलचित्रका लागि निर्माणपक्षले मलाई छनोट गरेकोमा म भाग्यमानी ठान्दछु । चलचित्रमा दोहोरो भूमिका मेरा लागि चुनौतीपूर्ण नै छ । तर, पंकज सर जस्तो निर्देशकसँग काम गर्न पाउँदा म उत्साहित छु ।’
निर्देशक पंकजले पनि श्रद्धाको प्रशंसा गरेका छन् । उनले, पर्दामा श्रद्धाले अभिनयको जादु छर्ने गरेको बताए । श्रद्धालाई दोहोरो भूमिकामा देख्न पाउँदा दर्शकमा उत्साह थपिने पंकजको तर्क छ ।
