१८ वैशाख, वीरगञ्ज । वीरगञ्जमा थप एकजना कोरोना संक्रमितको मृत्यु भएको छ ।

नेशनल मेडिकल कलेजले सञ्चालन गरेको कोरोना अस्पतालमा उपचारको क्रममा वीरगञ्ज छपकैया बस्ने ६७ वर्षीय पुरुषको आज बिहान पौने ६ बजे मृत्यु भएको हो । योसँगै वीरगञ्जमा कोरोना संक्रमणबाट मृत्यु हुनेको संख्या ३१ पुगेको छ ।

कोरोना संक्रमण पुष्टि भई तीन दिनअघि भर्ना भएका उनी २४ घण्टादेखि भेन्टिलेटरमा थिए । हाईफ्लो अक्सिजन दिँदा समेत उनको स्वास्थ्यमा सुधार भइरहेको थिएन । सक्दो प्रयास गर्दा समेत उनलाई बचाउन नसकिएको कोरोना अस्पतालमा खटिएका डाक्टर ओम प्रकाश कुशवाहाले जानकारी दिए ।

‘विरामीको अक्सिजन लेभल २५ भन्दा माथि गइरहेको थिएन,’ उनले भने, ‘भेन्टिलेटरमा समेत राख्यौ, तर बचाउन सकिएन ।’

नेशनल मेडिकल कलेजले सञ्चालन गरेको कोरोना अस्पतालमा २३ जना संक्रमित उपचाररत छन् । जसमध्ये ९ जना भेन्टिलेटरमा छन् । अस्पतालका अनुसार संक्रमित सबैलाई १२ लिटरसम्म अक्सिजन जढाउनु परेको छ । शंकास्पद संक्रमितको संख्या समेत दैनिक बढी रहेको छ ।