९ जेठ, काठमाडौं । काठमाडौंको टेकुस्थित शुक्रराज ट्रपिकल तथा सरुवा रोग अस्पतालमा संक्रमितको चाप फेरि बढेको छ ।
अस्पतालका निर्देशक डा. सागर राजभण्डारीले अस्पतालमा आइतबार एक्कासी संक्रमितको चाप बढेको बताए ।
‘अस्पतालमा आइतबार एक्कासी संक्रमितको चाप बढेको छ,’ उनले भने, ‘१९ जना बिरामीलाई अस्पतालको बरण्डामा कुर्ची, बेञ्च तथा भुइँमा राखेर उपचार गरिरहेका छौं ।’
अस्पतालमा १२९ जना संक्रमितको उपचार भइरहेको छ । हाल आईसीयू, भेन्टिलेटर लगायतका सबै बेड भरिभराउ भएका कारण उनीहरुलाई बाहिर राखेर उपचार गराउनुपर्ने बाध्यता रहेको बताए ।
शुक्रबार–शनिबारसम्म अस्पतालमा बिरामीको चाप कम थियो । तर आइतबार एक्कासी संक्रमितको चाप बढेको डा. राजभण्डारीले बताए ।
अस्पतालको पिँढीमा राखेरै भएपनि संक्रमितको उपचार गराएको सूचनाको आधारमा उनीहरु टेकु अस्पताल आएको हुन सक्ने उनको अनुमान छ ।
अन्य अस्पतालमा बेड अभाव वा अक्सिजन अभावका कारण उपचार नपाएका बिरामी पनि टेकु आउँदा चाप बढेको हुन सक्ने डा. राजभण्डारीले बताए ।
