१० जेठ, काठमाडौँ । बंगालको खाडीमा रहेको न्यून–चापीय क्षेत्रमा बनेको चक्रवातका कारण मंगलबारदेखि नेपालका विभिन्न भूभागमा हावाहुरी, वर्षा र हिमपातको सम्भावना देखिएको छ ।
उक्त न्यून–चापीय क्षेत्र चक्रवातमा परिणत भएको र मंगलबारसम्म धेरै शक्तिशाली चक्रवातमा परिणत हुने जल तथा मौसम विज्ञान विभागअन्तर्गतको मौसम पूर्वानुमान महाशाखाले प्रक्षेपण गरेको छ ।
हाल पूर्वीमध्य बंगालको खाडीमा रहेको न्यून-चापीय क्षेत्र आज सोमबार (जेठ १० गते) चक्रवातमा परिणत भई मंगलबार सम्ममा अति धेरै शक्तिशाली चक्रवात(Very Severe Cyclonic Storm)मा परिणत हुने देखिन्छ। उक्त चक्रवातको केहि असर नेपालको भूभागमा समेत पर्ने सम्भावनाhttps://t.co/YC6erz2ZxP pic.twitter.com/GoHkDQMDIx
— Nepal Weather Forecast (@DHM_Weather) May 24, 2021
सो प्रणालीका कारण मंगलबार अपराह्नपछि देशका धेरै स्थानमा सामान्यदेखि पूर्ण बदली भई वाग्मती प्रदेश र प्रदेश नं १ का उच्च हिमाली-पहाडी भूभागका केही स्थानमा हल्कादेखि मध्यम हिमपात र वर्षाको सम्भावना रहेको मौसमविद् समीर श्रेष्ठले बताए ।
उनले भने, ‘बंगालको खाँडीमा चक्रवात बन्न सुरू भइसकेको छ। नेपालमा यसको प्रभावमा मंगलबारदेखि हुन्छ खासगरी पूर्वी भागमा । पश्चिमी भागमा भने बिहीबारदेखि प्रभाव देखिन्छ ।’
महाशाखाले उच्च हिमाली भूभागमा हावाहुरी, हिमपात र वर्षाको सम्भावना रहेकाले मंगलबारदेखि केही दिनसम्म पर्वतारोहीलाई मौसमअनुसार सतर्कता अपनाई सुरक्षित रहन अनुरोध गरेको छ ।
देशका धेरै स्थानमा बुधबारदेखि केही दिन हल्कादेखि मध्यम वर्षाको सम्भावना छ । साथै प्रदेश नं १, प्रदेश नं २, वाग्मती, गण्डकी र लुम्बिनी प्रदेशका केही स्थानमा भारी वर्षा तथा बिहीबार कर्णाली र सुदूरपश्चिम प्रदेशका एक–दुई स्थानमा समेत भारी वर्षाको समेत सम्भावना रहेको मौसमविद् श्रेष्ठले बताए ।
यो मौसममा मेघगर्जन-चट्याङ-हावाहुरी र असिना–पानीको समेत सम्भावना रहेकाले आवश्यक सतर्कता अपनाउन महाशाखाले अनुरोध गरेको छ ।
