१७ जेठ, काठमाडौं । स्पानिस क्लब बार्सिलोनाले अर्जेन्टिनाका स्ट्राइकर सर्जियो अगुएरोलाई अनुबन्ध गरेको छ । बार्सिलोनाले सोमबार अगुएरोलाई फ्रि ट्रान्सफरमा अनुबन्ध गरेको हो ।
प्रिमियर लिग क्लब म्यानचेष्टर सिटीसंगको सम्झौता सकिएपछि अगुएरो जुलाई १ देखि बार्सिलोनामा आबद्ध हुने गरी सहमति भएको बार्सिलोनाले जनाएको छ ।
३२ वर्षीय अगुएरो र बार्सिलोनाबीच दुई वर्षको सम्झौता भएको छ । जसको अर्थ अगुएरो २०२२-२३ सिजनसम्म बार्सिलोनामा बस्नेछन् ।
यस्तै बार्सिलोनाले उनको रिलिज क्लज १०० मिलियन युरो राखेको छ ।
अगुएरोले सोमबारै स्वास्थ्य परीक्षण समेत भएको छ । सोमबारै उनले क्लबसंग सम्झौतामा हस्ताक्षर गर्नेछन् । त्यसपछि क्याम्प नोउमा फोटो सेसन हुनेछ र उनलाई बार्सिलोनाको खेलाडीको रुपमा प्रस्तुत गरिनेछ ।
अगुएरो १० वर्षअघि स्पेनकै एट्लेटिको मड्रिडबाट सिटी पुगेका थिए । प्रिमियर लिगमा एक दशक बिताउँदा सिटीको लागि सर्वाधिक गोलकर्ताको कीर्तिमान बनाएका अगुएरो फेरि स्पेनमै पर्किएका हुन् ।
अब उनी र्जेन्टाइन कप्तान लिओनल मेसीसंगै बार्सिलोना जर्सीमा हुनेछन् । तर मेसीको सम्झौता यही जुनमा सकिँदैछ र उनको सम्झौता नविकरण बारे अझै निर्णय भएको छैन ।
