आफ्नी आमालाई भू–माफियाले अपहरण गरेको भन्दै पाकिस्तानी नायिकाले गुहारिन् प्रधानमन्त्री

बलिउड चलचित्र ‘नजर, शैतान’ लगायतमा काम गरेकी पाकिस्तानी नायिका मीराले आफ्नी आमालाई भू–माफियाले अपरहण गरेको भन्दै पाकिस्तानी प्रधानमन्त्री इमरान खासँग सहयोग मागेकी छिन् ।

नायिकाले हालैमात्र लाहोरको क्यापिटल सिटी पुलिस अफिसमा सम्पत्ती सम्बन्धी बिषयमा निवेदन दिएकी छिन् । उनले, पाकिस्तानी प्रधानमन्त्री इमरान खानसँग यो बिषयमा ध्यान दिन आग्रह पनि गरेकी छिन् ।

मीराले आफूलाई मिया शाहिद महमुदले धम्की दिइरहेको बताउँदै आफ्नो सम्पतीमा भाडामा बसेपछि त्यसलाई आफ्नो बनाउन हतकन्डा अपनाइरहेको आरोप लगाएकी छिन् । उनले, आफ्नी आमालाई समेत महमुदले अपहरण गरेको भन्दै आफ्नो सम्पत्ती प्राप्त गर्नका लागि थुप्रै हतकन्डा अपनाएको बताएकी छिन् ।

मीराले आफूले आफ्नो करिअर पाकिस्तानका लागि समर्पित गरेको भन्दै आफ्नो जमिन कब्जा गर्न खोज्नेहरुको विरुद्धमा सरकारको प्रतिक्रियाको प्रतिक्षा गरिरहेको उल्लेख गरेकी छिन् ।

४४ सालकी मिराको वास्तविक नाम इर्जिजा रुबाब हो । उनले, उर्दु, पञ्जाबी र बलिउड चलचित्रमा काम गरेकी छिन् । उनले ‘नजर, कसक, पाँच घन्टे मे पाँच करोड, भडास, बम्पर ड्र, शैतान’ लगायतका चलचित्रमा काम गरेकी छिन् ।