३१ असार, काठमाडौं । चेक रिपब्लिकका फरवार्ड प्याट्रिक सिकको गोल युरोकप २०२० को उत्कृष्ट गोल चुनिएको छ । २५ वर्षीय सिकले समूह चरणमा स्कटल्यान्डविरुद्ध गरेको गोल उत्कृष्ट बनेको हो ।
यूईएफएले बुधबार सामाजिक सञ्जालमार्फत सिकको गोलले सर्वाधिक मत पाउँदै उत्कृष्ट घोषित भएको जनाएको हो । सिकले झन्डै ५० मिटर टाढाबाट गरेको प्रहार सिधै गोलमा परिणत भएको थियो । स्कटल्याण्डका गोलकिपर डेभिड मार्सलले त्यसलाई रोक्ने कुनै अवसर नै पाएनन् ।
यूईएफएको टेक्निकल अब्जर्भर टिमले १० उत्कृष्ट गोलको सूची तयार पारेको थियो । त्यसैबाट सिकको गोल उत्कृष्ट चयन भएको हो ।
युरोकपमा सिकले पोर्चुगलका क्रिस्टियानो रोनाल्डो समान ५ गोल गरेका थिए । तर एक असिस्ट समेत गरेका रोनाल्डोले सर्वाधिक गोलकर्ता बन्दै गोल्डेन बुट जिते ।