१८ साउन, काठमाडौं । मेक्सिकोलाई १-० ले हराउँदै अमेरिकाले कोनकाकाफ गोल्डकपको उपाधि जितेको छ । माइल्स रोबिन्सनले अतिरिक्त समयमा गरेको निर्णायक गोलको मद्दतमा अमेरिकाले विजयी भएको हो ।
अमेरिकाको अलेजियन्ट स्टेडियममा भएको खेलको निर्धारित ९० मिनेटमा दुवै तर्फबाट गोल नभएपछि ३० मिनेटको समय थप गरिएको थियो ।
त्यसकै अतिरिक्त समयको सकिन तीन मिनेट बाँकी छँदा रोबिन्सनले निर्णायक गोल गर्दै अमेरिकालाई च्याम्पियन बनाए ।
सेमिफाइनलमा अमेरिकाले एसियन राष्ट्र कतार तथा मेक्सिकोले क्यानडालाई पराजित गरेको थियो ।
अमेरिकाले गोल्ड कप उपाधि जितेको यो सातौं पटक हो । मेक्सिकोले सर्वाधिक ११ पटक उपाधि जितेको छ ।
आमन्त्रित राष्ट्रका रुपमा प्रतियोगिता खेलेको कतारका अलमोज अली ४ गोल गर्दै सर्वाधिक गोलकर्ता बने ।
