एट्लेटिको मड्रिड र भ्यालेन्सियाको तेस्रो जित

२८ भदौ, काठमाडौं । साविक विजेता एटणलेटिको मड्रिड र भ्यालेन्सियाले स्पानिस ला लिगामा सिजनको तेस्रो जित हात पारेका छन् ।

गएराती भएको खेलमा भ्यालेन्सियाले ओसासुनालाई ४-१ ले पराजित गर्दै शीर्ष स्थानमा उक्लेकाे छ । त्यसअघि एट्लेटिकोले स्पानयोलाई २-१ ले पराजित गरेको थियो ।

दुवै टिमले समान १० अंक जोडे पनि गोल अन्तरमा भ्यालेन्सिया अघि छ ।

भ्यालेन्सियाले एक गोलले पछि परेको स्थिती उल्टाउँदै ओसासुनामाथि पुनरागमन जित हासिल गरेकाे हो ।

जोल मोनसायलोलेआठौं मिनेटमै गोल गर्दै घरेलु टोली ओसासुनालाई पहिले अग्रता दिलाएका थिए । तर म्याक्सिमिलयानो गोमेजले २६औं मिनेटमा भ्यालेन्सियाका लागि बराबरी गोल फर्काए ।

५०औं मिनेटमा एरिडाने हर्नान्डेजले आत्मघाती गोल गरेपछि भ्यालेन्सियाले २-१ को अग्रता बनायो । त्यसपछि गोन्जालो गुएडेजले ५५औं र ओमार एलडेरेटेले गोल गरेपछि भ्यालेन्सिया सहजै विजयी भयो ।
त्यसअघि एट्लेटिकोले पनि पुनरागमन जित हात पार्ने क्रममा यानिक कारास्को र थोमस लेमारले दोस्रो हाफमा गोल गरे । लेमनरले इन्जुरी टाइमको नवौं मिनेटमा विजयी गोल गरेका थिए ।

त्यसअघि ४०औं मिनेटमा राहुल डे टनेमसले गोल गर्दै घरेलु टोली स्पानयोललाई अग्रता दिलाए पनि कारास्कोले ७९औं मिनेटमा बराबरी गोल गरेका थिए।