चेल्सी नकआउट चरण नजिक

काठमाडौं । माल्मोविरुद्ध १-० को कठिन जितपछि साविक विजेता चेल्सी युरोपियन च्याम्पियन्स लिगको नकआउट चरण नजिक पुगेको छ ।

समूह एच अन्तर्गत मंगलबार राति भएको खेलमा चेल्सीलाई जित दिलाउन हाकिम जियचले एक मात्र गोल गरे । उनले ५६औं मिनेटमा कलुम हडसन ओडँइको पासमा गोल गरेका थिए ।

जितपछि चेल्सीले चार खेलबाट ९ अंक जोडेको छ र दोस्रो स्थानमा छ । १२ अंक जोडेको युभेन्ट्स नकआउट चरणमा छनोट भइसकेको छ । चेल्सीलाई अब अन्तिम १६ मा पुग्न १ अंक मात्र आवश्यक छ ।

लगातार चार हारपछि अंकविहीन रहेको माल्मो भने समूह चरणबाटै बाहिरिएको छ ।