+
+

कक्षा १२ का विद्यार्थीले बनाए विजुलीबाट चल्ने मोटरसाइकल

टोपराज शर्मा टोपराज शर्मा
२०७८ मंसिर ६ गते १८:१६

६ मंसिर, बुटवल । बुटवलका एक विद्यार्थीले पेट्रोलबिना चल्ने विद्युतीय मोटरसाइकल बनाएका छन् ।

बुटवल देवीनगरको नवीन औद्योगिक माविमा सिभिल ओभरसियर विषय पढ्दै गरेका कक्षा १२ का विद्यार्थी सागर पोखरेलले कन्ट्रोलर म्यानेजमेन्ट सिस्टम प्रयोग गरेर विद्युतीय मोटरसाइकल बनाएका हुन् ।

४८ भोल्टको लिड एसिड ब्याट्री र ७ सय ५० वाटको मोटरका माध्यमबाट चल्ने मोटरसाइकल प्रतिघण्टा ४५ देखि ५० किलोमिटर प्रतिघण्टा गुड्न सक्ने १८ वर्षीय पोखरेलले बताए । १२ भोल्टको ब्याट्रीमा ३२.५ एम्पियर सिरिज कन्भर्ट गरेर ४८ भोल्ट बनाएको उनले जानकारी दिए ।

एकपटक चार्ज गरेपछि मोटरसाइकल एक सय किलोमिटर गुड्न सक्ने सागरले बताए । ‘करिब एक वर्षको प्रयासबाट यो मोटरसाइकल बनाउन सफल भएको हुँ, पोखरेलले भने, ‘एक लाख रुपैयाँ हाराहारीमा मोटरसाइकल बन्ने रहेछ ।’

मोटरसाइकलमा ब्याक गियर र तीनथरि ब्रेकको विशेषता भएको सागरले बताए । उकालो सडकमा ब्याक गियर उपयोगी हुने उनको भनाइ छ । मोटरसाइकलमा भएको ई ब्रेकिङले दुर्घटनाबाट जोगाउने सागरले दावी गरे ।

लिड एसिड ब्याट्री तीन वर्षसम्म टिक्ने र लिथेयम ब्याट्री प्रयोग गरेमा ६ वर्षसम्म टिक्ने उनले बताए । राज्यका सम्बन्धित निकायले सहयोग गरेमा व्यवसायिक रुपमा विद्युतीय मोटरसाइकल स्वदेशमै बनाउन सकिने सागरको विश्वास छ ।

‘अबको युग विद्युतीय सवारीको हो’ सागर भन्छन्, ‘यो वातावरणमैत्री पनि हुन्छ,पेट्रोलमा हुने खर्च जोगिएर ब्यापार घाटा कम गर्न पनि सकिन्छ ।’ आफूले सानै उमेरदेखि एक्साभेटर, रोबोट, भ्याकुम क्लिनर लगायतका विद्युतीय सामग्रीका नमूना बनाउँदै आएको सागरले सुनाए ।

विद्यालयले गर्‍यो सम्मान

विद्युतीय मोटरसाइकल बनाएर नमूना काम गरेको भन्दै नवीन औद्योगिक माविले सागरलाई ५० हजार रुपैयाँ नगदसहित सोमबार सम्मान गरेको छ । सो अवसरमा सागरले आफूले बनाएरको मोटरसाइकल विद्यार्थी र अभिभावकमाझ चलाएर प्रदर्शन गरेका छन् ।

विद्यालयका प्रधानाध्यापक प्रेम बस्नेतले सागर नवीन सोचका प्रतिभाशाली विद्यार्थी भएको भन्दै उनलाई प्रोत्साहनको खाँचो रहेको बताए । सागरलाई राष्ट्रिय आविष्कार केन्द्रले समेत थप तालिमका लागि बोलाएको बस्नेतल जानकारी दिए ।

लेखकको बारेमा
टोपराज शर्मा

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment