२६ मंसिर,काठमाडौं । साफ यू-१९ महिला फुटबल : पहिलो खेलमा बंगलादेशसंग नेपालको बराबरी
शनिबारदेखि बंगलादेशमा सुरु भएको साफ यू-१९ महिला फुटबल च्याम्पियनसिपको पहिलो खेलमा नेपालले बंगलादेशसँग गोलरहित बराबरी खेलेको छ ।
बंगलादेशको ढाकास्थित वीर श्रेष्ठ शहीद सिपाही मुस्तोफा कमल स्टेडियममा नेपालले घरेलु टिमसँग अंक बाँड्दै प्रतियोगिता सुरुवात गरेको हो ।
बंगलादेशले नेपालमाथि धेरै दबाब बनाएपनि नेपाल गोल खानबाट जोगियो । नेपालकी विमला विकले गोल लाइनबाट दुई सेभ गरिन् । यस्तै कप्तान तथा गोलकिपर अन्जना राना मगरले उत्कृष्ट प्रदर्शन गरिन् ।
प्रतिस्पर्धात्मक खेलमा नेपालले पनि पाएको केही अवसर सदुपयोग गर्न सकेन ।
बराबरीपछि नेपालले पहिलो खेलमा १ अंक जोडेको छ ।
च्याम्पियनसिपको पहिलो खेलमा भुटानले श्रीलंकालाई ५-० ले हराएको छ ।
अब नेपालले दोस्रो खेलमा बुधबार श्रीलंकाविरुद्ध खेल्नेछ ।
प्रतिक्रिया 4