+
+
पाटीबाट शुरु भएको स्कूलको दुरवस्था :

माथि जीम सेन्टर, तल कक्षाकोठा

विद्यालयमा कक्षाकोठाको दुःख सकिएको छैन । ईसीडीदेखि कक्षा आठसम्म सञ्चालन अनुमति पाएको विद्यालयले भवनको ६ वटा कोठा मात्र प्रयोग गर्न पाएको छ । पर्याप्त कक्षाकोठा नभएकै कारण बिहान र दिउँसो गरी दुई सिफ्ट पठनपाठन गराउनु परेको छ ।

नुनुता राई नुनुता राई
२०७८ पुष १५ गते २०:३८

१५ पुस, काठमाडौं । मित्र आधारभूत विद्यालय, चाबहिलको साढे पाँच दशक लामो इतिहास छ । २०२२ सालमा ‘पाटी पाठशाला’का रुपमा स्थापना भएको यो स्कूलमा २०२५ सालदेखि २५ वर्ष गणेश मन्दिरको पाटीमा कक्षा १ देखि ३ सम्म पठनपाठन भयो । पूर्वप्रधानाध्यापक उद्धव भण्डारीका अनुसार पाटी जीर्ण हुँदै गएकाले २०५० मा सबै पक्षको सहमतिमा साविकको गाउँ पञ्चायतको भवनमा सारियो ।

विद्यालयमा कक्षाकोठाको दुःख सकिएको छैन । ईसीडीदेखि कक्षा आठसम्म सञ्चालन अनुमति पाएको विद्यालयले भवनको ६ वटा कोठा मात्र प्रयोग गर्न पाएको छ ।

पर्याप्त कक्षाकोठा नभएकै कारण बिहान र दिउँसो गरी दुई सिफ्ट पठनपाठन गराउनु परेको छ । बिहान ६, ७, ८ कक्षाका विद्यार्थीले पढ्छन् भने दिउँसो बाँकी कक्षाका विद्यार्थी । कोठाकै अभावमा गैरसरकारी संस्थाले दिएको ६ वटा कम्प्युटर प्रयोग गर्न सकिएको छैन भने किताबहरु बोरामा कोचेर राख्नु परेको छ । प्रधानाध्यापक उमा निरौलाले दुखेसो पोखिन्, ‘यसलाई छुट्टै कोठा बनाएर व्यवस्थित लाइब्रेरी बनाउन मन छ, तर विद्यार्थी पढ्नका लागि कक्षाकोठा पुगेको छैन ।’

प्रधानाध्यापक उमा निरौला ।

१७२ जना विद्यार्थी अध्ययनरत विद्यालयले कक्षाकोठाको अभाव झेलिरहँदा भवनको माथिल्लो तलामा भने जीम सेन्टर चलिरहेको छ । सदन स्मृति क्लबले सज्जन जीम सेन्टर चलाएको हो ।

कक्षाकोठा अभाव भएपछि विद्यालय प्रशासनले जीम सेन्टर सार्न राजनीतिक दलका स्थानीय प्रतिनिधि, सरोकारवालासँग संवाद गरेको थियो । तर नजिकै अरु विद्यालय पनि छन्, किन यो चाहियो भन्ने आशय व्यक्त गरेको गुनासो प्रधानाध्यापक निरौलाले गरिन् । ‘मभन्दा अघिका प्रधानाध्यापकले पनि प्रयास गर्नुभएको रहेछ । म आएपछि पनि कुरा गरें, तर जीम स्वास्थ्यसँग जोडिएको मात्र होइन, विद्यालय नै विद्यालय किन चाहियो भन्नेसम्म कुरा आए’ उनने भनिन् ।

जीम सञ्चालक डोमी शेर्पा भने क्लब भएको भवनमा विद्यालय आएर बसेकाले गुनासो गर्न नमिल्ने बताउँछन् । भन्छन् ‘यो सामुदायिक क्लब हो । क्लबको भवनमा विद्यालय राखिएको हो । विद्यालयको भवन पनि होइन, जग्गा पनि होइन ।’

शेर्पाले भने जस्तै यो भवन वा भवन भएको जग्गा विद्यालयको होइन । तर क्लबको पनि होइन ।

काठमाडौं महानगरपालिका ७ का वडाध्यक्ष शुद्ध डंगोलका अनुसार यो भवन तत्कालीन गाउँ पञ्चायतको भवन हो भन्ने थाहा छ । तर कसको नाममा छ भन्ने खोजिएको छैन ।

प्रधानाध्यापक निरौला भन्छिन्, ‘यो गाउँ पञ्चायतको भवन हो । पञ्चायत हटेपछि खाली भएको भवन प्रयोग गर्न पाइने भनेको छ । विद्यालय वा कुनै क्लबलाई भन्ने छैन ।’

२२ वर्ष (करीब ७ वर्ष शिक्षक र १५ वर्ष प्रधानाध्यापक) विद्यालयमा काम गरेका पूर्वप्रधानाध्यापक भण्डारी आफ्नो पालामा विद्यालयलाई थप व्यवस्थित बनाउन धेरै प्रयास गरेको बताउँछन् । भन्छन्, ‘स्थानीयको चासो नहुँदा मेरो प्रयास सफल भएन ।’ यहाँ पढ्ने बालबालिका भनेको घरेलु श्रमिकका, निम्न आयस्रोत भएकाहरुका बालबालिका भएकाले पनि कसैको चासोको विषय नबनेको उनको भनाइ छ ।

उनले हाल दीर्घायु गुरु अस्पताल भएको जग्गा शिक्षण संस्थाकै भएको र विद्यालय सञ्चालनका लागि बकसपत्र भएको थाहा पाएपछि उनले विद्यालयको नाममा ल्याउन पहल गरे । ‘महेन्द्र चिल्ड्रेन पेडागोजी’ शिक्षण संस्थाको नाममा रहेको उक्त जग्गा बकसपत्रको बलमा टहरा बनायो । तर बकसपत्र दिने व्यक्तिकै परिवारले रिट हालेपछि हाल मुद्दा सर्वोच्चमा पुगेको प्रधानाध्यापक उमा निरौलाले बताइन् ।

अहिले विद्यालय नजिकै रहेको सार्वजनिक जग्गा दिन वडा कार्यालयले मौखिक सहमति जनाएको छ । भनिन्, ‘महानगरले पनि कक्षाकोठा निर्माणको लागि रकम दिने भएको छ । यहाँ सकेपछि सर्वोच्चमा रहेको मुद्दाबारे छलफल गर्ने भन्ने छ ।’

तस्वीर : शंकर गिरी/अनलाइनखबर

लेखकको बारेमा
नुनुता राई

यो खबर पढेर तपाईलाई कस्तो महसुस भयो ?

Khusi
                                chhu

खुसी

Dukhi
                                chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?