यो संसार कसको हो ?

म सानो छँदा

बुबाले भैंसी दुहुँदै गर्दा

दूध खान

म गिलास लिएर बस्ने गर्थें छेउमा

त्यसैबेला देख्थें म बुबाले कहिल्यै भैंसीका

दुई थुन दुहुनु भएन ।

धान काट्ने बेला खेतमा

म बुबाको पछि लाग्थें

कहिले खेतको आलीमा

कहिले ढुंगामा बसेर हेर्थें

बुबा भन्नु हुन्थ्यो-

खेतमा खसेका धानका बाला टिप्नु हुँदैन ।

बारीमा आलु खन्दै गर्दा

हामी केटाकेटी पछिपछि डुल्थ्यौं

र,

सिला टिपेका आलु पोलेर खान्थ्यौं

त्यस्तो देखेर बुबा भन्नुहुन्थ्यो-

बारीका सिलाहरु टिप्नु हुँदैन ।

मुसाले कोदो खाएर

कुना कुनामा प्वाल खोलेर थुपार्दा

बारीमा विष हाल्ने चर्चा हुन्थ्यो

बुबा भन्नुहुन्थ्यो-

मुसालाई विष हाल्नु हुँदैन ।

बालक म

सोधिरहन्थें-

बुबा किन त्यसो भन्नुभएको ?

एकदिन

मलाई बुबाले भन्नुभयो-

भैंसीका सबै दूध हामीले

खाइदियौं भने

पोखिएको सबै बाली हामीले घर लग्यौं भने

सबै मुसाहरु विष हालेर मा¥यौ भने

यिनीहरुको जीवन के हुन्छ ?

यिनीहरुका छोराछोरीको जीवन के हुन्छ ?

के संसार मान्छेको मात्रै हो ?

अहिले

बुबा हजुर बुबा हुनुभएको छ

म बुबा भएको छु

सडकमा माग्न बसेका

मान्छेहरु देख्दा

पशुपति र स्वयम्भूमा

बिरामी र भोका बाँदरहरु देख्दा

सडकमा गर्भिणी

कुकुर र बिरालाहरु देख्दा

म प्रश्न गर्छु आफैंसित-

यो संसार

कसको हो ?