कन्टिनेन्टल मोटर्सलाई थप २३५ गाडीका लागि साढे ३६ करोडको आयात अनुमति

११ वैशाख, काठमाडौं । नेपाल राष्ट्र बैंकबाट आयात बन्दको अग्रिम सूचना लिएर कन्टिनेन्टल मोटर्स गैह्रीधाराले साढे ३६ करोड रुपैयाँ बराबरको थप २३५ थान गाडी आयातका लागि अनुमति पाएको खुलेको छ ।

योसँगै कोरियन कम्पनी कियाको नेपाली बिक्रेता कन्टिनेन्टल मोटर्स इन्टरप्राइजेजले राष्ट्र बैंकबाट अग्रिम सूचना चुहिएपछि आयात अनुमति पाएको सवारी साधनको संख्या ८६५ पुगेको छ । यसअघि कन्टिनेन्टलले चैत ११ र १७ गते ६३० थान कार आयातको एलसी (प्रतीतपत्र) खोलेको थियो ।

यो पनि पढ्नुहोस

आयात रोक्दारोक्दै एकै कम्पनीले खोल्यो ६०० गाडीको एलसी, सूचना चुहिएको आशंका

आयात बन्द गर्ने वस्तुहरुको सूची सुझावको रुपमा अर्थ मन्त्रालयमा राष्ट्र बैंकले बुझाएकै दिन यो कम्पनीले ३७ करोड मूल्य भन्दा बढीको इसुजु ब्राण्डको हाइल्याण्डर* पिकअप गाडीको एलसी खोलेको हो ।

नेपाल बैंकबाट जारी एलबीएल २२८४०० एलसी नम्बरबाट एस क्याब एचआचर डबल क्याब हाइल्याण्डर पिकअप ७५ थान र भी क्रस हाइल्याण्डर १६० थानका लागि एलसी खुलेको अनलाइनखबरलाई प्राप्त कागजातमा देखिन्छ ।

एस क्याब एचआचर डबल क्याब हाइल्याण्डर ७५ थानका लागि ६ करोड १६ लाख ५० हजार भारतीय रुपैयाँ र र भी क्रस हाइल्याण्डर १६० थान गाडीका लागि १६ करोड ६७ लाख २० हजार भारुमा एलसी खोलिएको छ ।

प्रतीत पत्रको कूल रकम २२ करोड ८३ लाख ७० हजार रुपैयाँ भारु अर्थात ३६ करोड ५३ लाख ९२ हजार रुपैयाँ नेपाली हुन्छ । प्रतीतपत्र खोलिएका गाडीको नेपाल आयातको सिपमेन्ट जेठ १९ गतेबाट सुरु हुने छ ।

कन्टिनेन्टल इन्टरप्राइजेज प्रालिका सञ्चालकद्वय सुहृद घिमिरे र पुरुषोत्तम पौड्याल अफसोर लगानी र बालुवाटार जग्गा प्रकरणमा संलग्न विवादित व्यापारी हुन् ।