२६ वैशाख, काठमाडौं । युएईको दुबईमा भइरहेको फेयरब्रेक इन्भिटेसनल क्रिकेट प्रतियोगितामा नेपाली राष्ट्रिय टिमकी अलराउण्डर सीता राना मगरले उत्कृष्ट प्रदर्शन गरेकी छन् ।
नेपालबाट कप्तान रुविना क्षेत्री र सीता यस प्रतियोगितामा छानिएका थिए । तर सीताले लगातार तीन खेल खेल्दै दोस्रो पटक विकेट लिन सफल भइन् । रुविनाले भने एक खेलमा अवसर पाएपनि ब्याटिङ र बलिङ गर्न पाएकी छैनन् ।
सीताले तीन खेल खेल्दा तीनवटै खेलमा बलिङ गरिन् भने दुई खेलमा विकेट लिइन् ।
संयोग कस्तो भए पछिल्लो खेल सीता समावेश टोर्नाडोज र रुविना समावेश ब्रामी आर्मीबीच थियो । उक्त खेलमा सीता पहिलो रोजाइमा खेल्दा रुविना भने बेन्चमा थिइन् । सीताले आफ्नो टिमका लागि एक विकेट लिइन् । तर खेल भने रुविना सम्मिलित ब्रामी आर्टी टिमले जित्यो ।
खेलमा २ ओभर बलिङ गरेकी सीताले २४ रन खर्चेर १ विकेट लिइन् । उनले ८ रन बनाएकी लाउरा वलभार्डलाई एलबीडब्लु धरापमा पारिन् ।
यद्यपि डिएन्ड्रा डोटनिको अविजित ५६ र काभिसा एभोडेजले ४३ रन बनाएपछि ब्रामी आर्मीले टोर्नोडाजलाई २५ बल अगावै ८ विकेटले हरायो । कप्तान हेथर नाइटले ९ बलमा अविजित २० रन जोडिन् ।
त्यसअघि टोर्नाडोजका लागि कप्तान स्टेफानी टेलरले अविजित ७८ र सुने लुसले अविजित ६६ रन बनाएका थिए । यी दुईले अविजित १४५ रनको साझेदारी गरेपछि टोर्नोडाजले २ विकेट गुमाएर १५० रन बनाएको थियो ।
सीताले लगातार तीन खेल खेल्दा आफ्नो प्रभाव देखाइसकेकी छिन् । उनले पहिलो खेलमै साफिर्स विरुद्ध अवसर पाउदा १ विकेट लिएका थिए । वारियर्स विरुद्धको खेलमा भने उनले विकेट लिन सकेनन् ।
डेढ दशकदेखि क्रिकेट खेल्न थालेकी सीताले पहिलो पटक विदेशमा गएर प्रतियोगिता खेलिरहेकी छन् ।
उनले सुरुमा आफूलाई फुटबल खेल्न मन लागेपनि त्यसमा धेरै प्रतिस्पर्धा भएकोले क्रिकेटतर्फ मोडिएको फेयरब्रेकसँगको कुराकानीमा बताएकी छन् । ‘म फेयर ब्रेकमा खेल्न पाउँदा भाग्यमानी अनुभव गर्छु ।’
उनले सुरुमा पहिलो खेलमा मैदान प्रवेश गर्दा नर्भस भएको बताइन् । उनले जर्सीमा नेपालको झण्डा राखेपछि नेपाललाई प्रतिनिधित्व गर्न पाउँदा खुशी लागेको बताइन् ।
प्रतिक्रिया 4