भारतमा व्यवसायिक गल्फ खेल्न गल्फर शुक्रलाई आर्थिक सहयोग

२ साउन, काठमाडौं । नेपालका नम्बर वान प्रोफेसनल गल्फर शुक्रबहादुर राईलाई भारतमा व्यवसायिक गल्फ खेल्न र प्रशिक्षण गर्नका लागि ८ लाख रुपैयाँ सहयोग संकलन भएको छ ।

प्रोफेसनल गल्फर्स एसोसिएसन (पीजीए) नेपालको पहलमा उनका लागि ८ लाख रकम जुटाइएको पीजीए नेपालले जनाएको छ । त्यसबाहेक उनले प्रिमियर अर्गानिक प्रालिसँग १ लाख ५० हजारको सम्झौता गरेका छन् ।

प्रोफेसनल गल्फर संघका अध्यक्ष रवीन्द्रमान श्रेष्ठले पनि ५० हजार दिने बताएका छन् । यसैगरी पर्नड रिचर्डका रविन्दर सैनीले २ लाख तथा ब्रिटिस गोर्खा कम्पनीले १ लाख रुपैयाँ दिएका छन् । सुहृद घिमिरे, चन्द्र टण्डन, आरआर पाण्डे, टासी घले, प्रवेश फुयाल, टिजी श्रेष्ठ, किसन अग्रवाल, टेण्डी शेर्पा र नोर्बु छिरिङ शेर्पाले ५०-५० हजार दिएका छन् । दीपक आचार्यले ३० हजार र सन्जय लामाले २० हजार दिएका छन् ।

शुक्रबहादुर राईले भारतमा व्यवसायिक गल्फ पीजीटीआइ खेलिरहेका छन् । मे महिनामा ब्रेक अगाडि उनले ६ वटा प्रतिययोगिता खेलेका थिए । त्यसमध्ये तीनवटामा ‘कट’मा परेका थिए ‌।

बाँकी १६ प्रतियोगिता भारतका विभिन्न गल्फ कोर्समा अगस्टदेखि डिसेम्बरसम्म हुँदैछ ।

अगष्ट २१ देखि बाँकी प्रतियोगिता सुरु हुनेछ । त्यसअघि उनले भारतको बेंगलोरस्थित भारतको प्रतिष्ठित तरुण सरदेशाइ गल्फ एकेडेमीमा १ महिनाको विशेष प्रशिक्षण लिनेछन् । त्यही एकेडेमीमा नेपालका एमेच्योर गल्फरहरु सुवास तामाङ र सद्भाव आचार्यले प्रशिक्षण लिइरहेका छन् ।

२१ अगस्ट २०२२ देखि १३ डिसेम्बर २०२२ सम्म खेल्ने १६ प्रतियोगिताको शीर्ष १६ भित्र पर्न सकेमा शुक्रले अर्को प्रतियोगितामा सिधै प्रवेश पाउनेछन् । यसपल्ट उनले छनोट पार गरेर यो प्रतियोगिताका लागि छानिएका हुन् । शुक्र हाल विश्व वरियतामा १८०६ औं स्थानमा छन् ।