सुहानालाई लिएर ‘भागवत गीता’ निर्देशन गर्दै झरना, वैशाख १ गते रिलिज हुने

काठमाडौं । झरना थापाको निर्देशन बन्ने फिल्म ‘भागवत गीता’को औपचारिक घोषणा भएको छ । श्रीकृष्ण जन्माष्टमीको अवसरमा शुक्रबार युट्युबबाट फिल्मबारे जानकारी दिइएको हो ।

फिल्म घोषणाको भिडियोमा अभिनेत्री सुहाना थापा फिचर्ड छिन् । जनकपुरधामको जानकी मन्दिरमा खिचिएको दृश्यमा सुहाना रामजानकी भक्तको रुपमा प्रस्तुत छिन् ।

उनी मन्दिरभित्रदेखि उत्साहित भएर दौडिंदै बाहिर निस्किएको र बाहिर निस्किएपछि उनी एकाएक भावुक हुँदै आँसु झारेको दृश्य देख्न सकिन्छ । उनको शीरबाट मयूरको प्वाँख भुइँमा खस्छ र सोहीअनुसार फिल्मको टाइटल कम्पोज गरिएको छ ।

दृश्यको पृष्ठभूमिमा मैथिली गीत ‘तोहरे भरोसे ब्रम्ह बाबा झिझिआ बनइलिअइ हो…’ सुन्न सकिन्छ ।

फिल्म जनकपुर र जानकी मन्दिरको परिवेशमा बन्न लागेको अनुमान गर्न सकिन्छ । सार्वजनिक टिजरले फिल्मको मुख्य पात्र गीतको चरित्रलाई स्थापित गरेको छ । फिल्मको नायक भने सार्वजनिक गरिएको छैन ।

२०८० सालको वैशाख १ गते (सन् २०२३ को अप्रिल १४)मा रिलिज घोषणा समेत गरिएको छ । सुहाना थापाकै होमप्रोडक्सन सुहाना इन्टरटेनमेन्ट र सुनिल थापा प्रोडक्सनको ब्यानरमा निर्माण हुन लागेको फिल्मको सहनिर्माता र अमेरिका वितरकको रुपमा अमृत राई, जंग राई र खेम गुरुङ छन् ।

सञ्जय लामाको छायांकन, साहिल खानको सम्पादन, रामजी लामिछानेको नृत्य निर्देशन, उत्तम न्यौपानेको ध्वनि डिजाइन रहेको छ । झरना र सुहाना दुवै राधाकृष्णका अनुयायी हुन् । सोहीकारण कृष्ण जन्माष्टमीमा फिल्मको औपचारिक घोषणा भएको हो ।

‘ए मेरो हजुर ४’ पछि झरना र सुहानाले होमप्रोडक्सन प्रोजेक्टमा सहकार्य गर्न लागेका हुन् ।