१६ भदौ, काठमाडौं । श्रीलंकामा भदौ २० गतेदेखि २९ गतेसम्म हुने साफ यू-१७ च्याम्पियनसिपमा प्रतिस्पर्धा गर्ने नेपाली टिमलाई बिदाइ गरिएको छ ।
अखिल नेपाल फुटबल संघ (एन्फा) ले बिहीबार एक कार्यक्रम गर्दै टोलीलाई बिदाइ गरेको हो । राष्ट्रिय खेलकुद परिषद (राखेप) का उपाध्यक्ष शिव कोइराला ‘ज्वाला’, एन्फा अध्यक्ष पंकज विक्रम नेम्वाङ र एन्फा पदाधिकारीले टोलीलाई बिदाइ गरे ।
एन्फा अध्यक्ष पंकज नेम्वाङले यसअघि नेपाल तीन पटक उपविजेता भएको भन्दै पहिलो पटक उपाधि जित्ने विश्वास व्यक्त गरे । उनले उपाधि जित्न टिमलाई शुभकामना दिए । राखेप उपाध्यक्ष शिव कोइरालाले पनि पहिलो पटक नेपाल च्यामपियन बन्नका लागि शुभकामना दिए ।
प्रमुख प्रशिक्षक उर्जन श्रेष्ठले बी डिभिजन र सी डिभिजन खेलिसकेका खेलाडी भएकाले टिम सन्तुलित भएको बताए । उनले आफूहरुको लक्ष्य विजेता बन्ने रहेको भन्दै जित्नकै लागि खेल्ने बताए ।
६ टिम सहभागी च्याम्पियनसिपमा नेपाल समूह बी मा छ । यस समूहमा भारत र भुटान पनि छन् । समूह एमा बंगलादेश, श्रीलंका र माल्दिभ्स छन् । नेपालले भदौ २२ गते भुटानसँग पहिलो खेल खेल्नेछ भने भदौ २४ गते भारतसँग खेल्नेछ । दुवै समूहबाट शीर्ष दुई टिम सेमिफाइनल प्रवेश गर्नेछन्
नेपाली टोली शुक्रबार श्रीलंका प्रस्थान गर्नेछ । सन् २०११ का नेपालबाट साफ यू-१७ च्याम्पियनसिपको रुपमा सुरु यस प्रतियोगिता अहिलेसम्म ६ पटक भएका छन् । जसमा भारतले सर्वाधिक ३ पटक, बंगलादेशले २ र पाकिस्तानले १ पटक उपाधि जितेका छन् । नेपालले अहिलेसम्म उपाधि जित्न सकेको छैन । नेपाल ३ पटक उपविजेता भएको थियो ।
नेपाली टिम
गोलकिपर : कृसल मोक्तान, समिर चन्द, रुविन बोगटी
डिफेन्डर : अश्विन घोरासैनी, सेमन्ता थापा, युनेस बुढाथोकी, मदन पौडेल, दीपक थापामगर, निशान्त तामाङ, युनिस मगर, विक्रम तामाङ, प्रितम कार्की, धिरज विश्वकर्मा
मिडफिल्डर : प्रशान्त लक्सम, मिरक लिङ्देन, सरोज धामी, हरिसराज भट्ट, लछु थापा
फरवार्ड : निरज कार्की, धनसिंह विक, विनोद केसी, सिजल राई, सुवास बम
प्रतिक्रिया 4