२८ मंसिर, काठमाडौं । लुका मोड्रिचले अर्जेन्टिनाविरुद्धको विश्वकप सेमिफाइनलमा सब्स्टिच्युड हुँदै गर्दा जर्सीले आफ्नो अनुहार छोप्दै मैदान बाहिरिए ।
क्रोएसियाका सेतो र रातो जर्सी लगाएका समर्थकले यो क्षणको महत्व पहिचान गर्दै छरिता मिडफिल्डरको सम्मान गरे, जो सायद उनीहरुको देशका अहिलेसम्मका महान खेलाडी हुन् ।
अर्जेन्टिनाका प्रफूल्ल समर्थकले पनि तत्कालै लुसेल रंगशालामा आफ्ना प्रतिस्पर्धीको सम्मान गरे । जसले सम्भवतः आफ्नो अन्तिम विश्वकप खेल खेलेका थिए ।
मंगलबार ८१औं मिनेटमा सब्स्टिच्युड हुँदा मोड्रिचको टिम ३ गोलले पछि परेको थियो । यसले विश्वकपमा मोड्रिच युगको अन्त्य भएको संकेत गरिरहेको थियो । साढे चार वर्षअघि फाइनलमा फ्रान्ससँग पराजित भएयता क्रोएसिया यसपल्ट सेमिफाइनलमा अर्जेन्टिनासँग ३–० ले हार्यो ।
लोभ्रो माजेरले प्रतिस्थापन गर्दैगर्दा मोड्रिच उदास थिए । बेन्चमा पुगेर शान्तपूर्वक आफ्नो सीटमा बसे । उनले समर्थकलाई कुनै इशारा गरेनन् । ‘हामी पुनः विश्वकपको फाइनलमा पुग्न चाहन्थ्यौं तर, दुर्भाग्यबस यो सम्भव तुल्याउन सकेनौं,’ मोड्रिचले भने ।
विश्वकपमा ३७ वर्षीय एक सुपरस्टार घर फर्किएको केहि दिनपछि नै अर्का सुपरस्टार पनि बाहिरिए । रियल मड्रिडका पूर्व टिममेट मोड्रिच र क्रिष्टियानो रोनाल्डोको उमेर समान छ । दुवै खेलाडी उपाधिले भरिएको आफ्नो करिअरको अन्त्यतिर छन् । तर, दुवै खेलाडी फुटबलको सबैभन्दा प्रतिष्ठित उपाधिबाट बिमुख हुने निश्चितजस्तै छ ।
विश्वकपको पूर्वसन्ध्यामा पियर्स मोर्गनसँगको विष्फोटक अन्तर्वार्तापछि रोनाल्डो चर्चामा थिए । तर, मोड्रिच मैदानबाटै आफूलाई प्रमाणित गर्न तल्लीन थिए । रुसमा फाइनलसम्म आफ्नो टिमको नेतृत्व गरेपछि उनी चार मिलियन जनसंख्या रहेको देशको प्रतिनिधित्व गरी लगातार दोस्रोपल्ट विश्वकपको सेमिफाइनलमा पुर्याउन मुख्य प्रेरणा थिए ।
यसैबीच म्यानचेस्टर युनाइटेडबाट बहिर्गमनसँगै साउदी अरवमा सम्भावित स्थानान्तरका बीच रोनाल्डो विश्वकपको आफ्नो सम्भावित अन्तिम खेलमा बेन्चमा सीमित थिए । पोर्चुगलको आशा मोरक्कोले समाप्त पारिदिएको हो ।
क्रोएसियाले ब्राजिल र नेइमारलाई क्वाटरफाइनलबाट घर पठाउँदा मोड्रिचको निर्णायक प्रदर्शन रह्यो । तर, उनले फुटबलको सबैभन्दा ठूलो उपाधि जित्ने व्यक्तिगत अभियानमा रहेको मेस्सीलाई रोक्न सकेनन् ।
मेस्सीले मंगलबार पेनाल्टीमार्फत गोल गरी टिमलाई सुरुवाती अग्रता दिलाएका थिए । त्यसपछि जुलियन अल्भारेको दुई गोलका लागि जादुयी मुभ बनाए ।
तर, लुसेल रंगशालामा मेस्सी एकमात्र प्रतिष्ठित खेलाडी थिएनन् । निश्चित रुपमा थुप्रै मानिसहरुले क्रोएसियाका सर्वश्रेष्ठ मानिएका मोड्रिचलाई सर्वश्रेष्ठ मिडफिल्डरको स्थान दिएका छन् । उनी रियल मड्रिडलाई पाँचपल्ट च्याम्पियन्स लिगको उपाधि दिलाउन महत्वपूर्ण भूमिकामा थिए । उनले सन् २०१८ मा बालोन डी’ओर अवार्डसमेत जितेका थिए ।
कतारमा उनको प्रदर्शनबाट प्रमाणित हुन्छ कि गोलका लागि निर्णायक पास दिन उनी अझै पनि सक्षम छन् । उनी सन् २०२४ को युरोपियन च्याम्पियनसिपमा आफ्नो देशका लागि अन्तिम हतियारका रुपमा राष्ट्रिय टिमबाट खेल्न सक्छन् । रियल मड्रिडले उनीबाट थप उपाधिको अपेक्षा पनि गर्न सक्छ ।
‘शायद यो हाम्रो एउटा पुस्ताका लागि अन्तिम विश्वकप हुनसक्छ । उनीहरुमध्ये केहि खेलाडी यस्ता उमेरका छन् जो सन् २०२६ को विश्वकप खेल्न असमर्थ हुनसक्छन् । हामी पर्ख र हेरको अवस्थामा हुनेछौं,’ प्रशिक्षक ज्लात्को ड्यालिकले भने, ‘मेरो विचारमा हाम्रा धेरैजसो खेलाडीको करिअर २०२४ को युरोपछि समाप्त हुनेछ ।’
Results
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
प्रतिक्रिया
Hot Properties
.jpeg)
%20-%20Copy.jpg)
प्रतिक्रिया 4