टेनिस सुपरस्टार नाओमी ओसाका आमा बन्दै

२८ पुस, काठमाडौं । चारपल्टका ग्राण्डस्लाम च्याम्पियन नाओमी ओसाकाले आफू गर्भवती भएको घोषणा गरेकी छन् ।

२५ वर्षीय पूर्व विश्व नम्बर एक जापानी खेलाडी ओशाकाले गत साता अस्ट्रेलियन ओपनबाट नाम फिर्ता लिएकी थिइन् । उनले गत सेप्टेम्बरयता खेलेकी छैनन् ।

‘२०२३ एक यस्तो वर्ष हुँदैछ जसले मलाई धेरै सिकाउनेछ,’ ओसाकाले भनेकी छन्, ‘एउटा कुरा मैले अहिलेदेखि नै सोचिरहेको छु कि मेरो बच्चाले मेरो एक म्याच हेरोस र अन्यलाई भनोस– ती मेरी आमा हुन् ।’

ओसाकाले सन् २०२१ मा चौथो ग्राण्डस्लाम जित्ने क्रममा अस्ट्रेलियन ओपनको उपाधि उचालेकी थिइन् । उनले त्यो स्मरणीय जितपछि आफूलाई देखएको समस्याका बारेमा पनि बताएकी छन् ।

मे २०२१ मा फ्रेन्च ओपनबाट बाहिरिएपछि उनले सन् २०१८ मा युएस ओपन जितेयता आफू डिप्रेसनको समस्याबाट पीडित रहेको खुलासा गरेकी थिइन् । सेप्टेम्बर २०२१ मा उनले खेलबाट ५ महिनाको विश्राम लिएकी थिइन् ।

विश्रामबाट फर्किएपछि उनले अस्ट्रेलियन ओपनमा तेस्रो चरणमा हार ब्यहोरिन् । फ्रेन्च ओपनको पहिलो चरणमै पराजित भइन् । चोटका कारण विम्बल्डन गुमाइन् भने युएस ओपनमा पहिलो चरणबाटै बाहिरिइन् ।

ओसाकाले पछिल्लो समय टोकियोमा पान प्यासेफिक ओपन खेलेकी थिइन् । उनी अहिले विश्व वरीयताको ४७औं स्थानमा छिन् ।

ओसाकाले सामाजिक सन्जालमार्फत आफ्नो गर्भावस्थाको घोषणा गर्दै भनेकी छन्, ‘पछिल्लो केहि वर्ष स्मरणीय रह्यो ।तर, मैले मेरो जीवनको सबैभन्दा चुनौतिपूर्ण समय आउँदै गरेको देखेको छु जुन रोमान्चक पनि हुनेछ ।’