अनुहारलाई जवान राख्न बोटोक्स विधि : कसरी गरिन्छ, कति लाग्छ खर्च ?

२०७९ माघ १९ गते १३:५६

डा. अनिलकुमार भट्ट छाला तथा यौनरोग विशेषज्ञ

जवान र सुन्दर देखिन चाहनु मानवीय स्वभाव नै हो । तर उमेर बढ्दै जाँदा छालामा परिवर्तन देखिन थाल्छ । जसमध्ये एउटा प्राकृतिक प्रक्रिया चाउरीपन पनि हो । उमेर बढ्दै जाँदा देखिने यो समस्या कसैलाई पनि समय अगावै देखा पर्छ ।

केहीमा वंशाणुगत कारणले पनि यस्तो समस्या हुन्छ भने कसैमा छालाको संक्रमणका कारण चाउरीपनको समस्या देखिन्छ । घामको पराबैजनी किरण, चिन्ता र खानपानले हाम्रो शरीरको सबै अंगमा जस्तै छालामा पनि असर गर्छ र अनुहारमा चाउरीपनको समस्या आउँछ ।

कसरी रोक्ने चाउरीपन ?

उमेर बढेसँगै छाला चाउरी पर्ने भएकाले यसलाई स्थायी रूपमा नै रोक्न त सकिंदैन । तर उमेरभन्दा पहिले देखा पर्ने चाउरीपनलाई रोक्न भने केही कुरामा ध्यान दिन सकिन्छ ।

उमेरभन्दा अघि देखा पर्ने चाउरीपनको समस्या कम गर्न छालाको हेरचाह गर्नुपर्ने हुन्छ । छालाको प्रकार अनुसारको फेसवास, सेरम र मोस्चराइजरको प्रयोग गर्नुपर्छ । घामको पराबैजनी किरणको कारणले पनि उमेरभन्दा अगावै चाउरीपनको समस्या देखिने भएकाले घामबाट बच्न सनस्क्रिन क्रिमको प्रयोग गर्नुपर्छ । एसपीएफ ३०, ४० र ५० भएको र यूभीए, यूभीबी भएको सनस्क्रिनको प्रयोग गर्नुपर्छ ।

उमेरभन्दा पहिले देखा पर्ने चाउरीपनलाई रोक्न अहिले नयाँ प्रवृत्ति बोटोक्स पनि आएको छ । यो सुईको माध्यमबाट उपचार गर्ने पद्धति हो ।

के हो बोटोक्स, कति लाग्छ खर्च ?

बोटोक्स एक औषधि हो, जसले छालालाई जवान राख्न मद्दत गर्छ ।  बोटुलिनम इन्जेक्सन अनुहारको भागमा दिइन्छ जहाँ चाउरीपन हुन्छ । यसले अनुहारको मांसपेशीलाई आराम दिन्छ । यो सम्पूर्ण प्रक्रियालाई बोटोक्स उपचार भनिन्छ । यो उपचार गरेपछि चारदेखि ६ महिनासम्म यसको प्रभाव छालमा रहन्छ ।

चाउरीपन हटाउन गरिने बोटोक्सको खर्च प्रतियुनिट ६०० रुपैयाँ पर्छ । चाउरी कति परेको त्यसअनुसार २०, ३० र ४० युनिट लाग्न सक्छ र खर्च पनि बढ्दै जान्छ ।

बोटोक्स गर्दा अनुहारको छालामा खास कुनै नकारात्मक असर गर्दैन । तर सुईको माध्यमबाट दिइने भएकाले अलि अलि दुखाइ महसुस हुन सक्छ । सुई दिएको नमिलेको खण्डमा आँखीभौंको भाग सुन्निने, आँखाको लिड झोल्लिने हुन सक्छ ।

(छाला तथा सौन्दर्यरोग विशेषज्ञ डा. अनिलकुमार भट्टसँग सुमित्रा लुइटेलले गरेको कुराकानीमा आधारित)

हट टपिक्स

अल्जाइमर

आयुर्वेद

इन्डोक्राइन (हर्मोन रोग)

एचआईभी

नेत्ररोग

प्रसूति तथा स्त्रीरोग

बालरोग

मानसिक स्वास्थ्य (डिप्रेसन, एन्जाइटी)

मिर्गौला तथा मुत्र रोग

मुख तथा दन्त रोग

योग तथा प्राणायाम

हेपटाइटिस