१९ जेठ, काठमाडौं । कीर्गिस्तानमा जुन १८ देखि २५ सम्म हुने काभा पुरुष भलिबल नेसन्स लिगका लागि नेपाली राष्ट्रिय भलिबल टोलीको घोषणा भएको छ ।
नेपाल भलिबल संघले शुक्रबार नेसन्स लिगका लागि १२ सदस्यीय अन्तिम टोली छनोट गरेको संघले जनाएको छ ।
टिममा ५ खेलाडी परिवर्तन भएको छ । टिममा सफल विक र हेमन्त बहादुर मल्ल र भिम गाहा मगरले पहिलो पटक सिनियर टिममा स्थान बनाएका छन् ।
रोविन चन्दले टिममा पुनरागमन गरेका छन् । पछिल्लो पटक नेपालले २०७८ मंसिर बंगलादेशमा एसियन पुरुष सेन्ट्रल जोन खेल्दा टिममा रहेका १२ मध्ये ७ खेलाडी मात्र अहिले टिममा छन् भने इम र इश्वरसहित ५ खेलाडी बाहिरिएका छन् ।
यस्तै भैरबबहादुर बम, विशाल विक र सरन सामरी क्षेत्री बाहिरिएका छन् ।
भलिबल संघले खुल्ला छनोट मार्फत यसअघि १८ जना खेलाडी छनोट गरेको थियो । त्यसैबाट अन्तिम टोली घोषणा भएको हो ।
यसअघि नै खुल्ला छनोटमा सहभागि नभएका कप्तान इम राना यस पटक टिममा छैनन् ।
यसअघि नेपाली टोलीमा नियमित लिब्रो रहेका इश्वर थापा पनि प्रशिक्षणमा सहभागि भएनन् ।
अन्तिम टिममा भिम गाहा मगर लिब्रोको रुपमा रहेका छन् ।
काभा नेसन्स लिगमा नेपालसँगै आयोजक कीर्गिस्तान, पाकिस्तान,उज्वेकिस्तान, काजखस्तान, इरान र तुर्किमिनेस्तानले प्रतिस्पर्धा गर्नेछन् ।
नेपाली टिमको प्रशिक्षकमा जगदिश भट्ट, सहायक प्रशिक्षकमा भरत यादव र म्यानेजरमा श्याम कृष्ठ श्रेष्ठ रहेको भलिबल संघका महासचिव रोशन श्रेष्ठले जानकारी दिए ।
नेपाली टोली
हरिहजुर थापा, लोकेन्द्र राज गिरी, मानबहादुर श्रेष्ठ, टेकराज अवस्थी, राजेन्द्र विष्ट, रोविन चन्द, दुर्गाबहादुर खड्का, हरिबहादुर अधिकारी सफल विक, धनबहादुर भट्ट क्षेत्री, हेमन्तबहादुर मल्ल, भीमबहादुर गाहा
प्रतिक्रिया 4