१५ असार, काठमाडौं ।अमेरिकी क्लब इन्टर मियामीले अर्जेन्टिना र क्याटलान क्लब बार्सिलोनाका पुर्व प्रशिक्षक गेरार्डो मार्टिनोलाई नयाँ प्रशिक्षकमा नियुक्त गरेको छ ।
६० वर्षीय मार्टिनोले पूर्व प्रशिक्षक फिल नेभिलको स्थान लिनेछन् । उनलाई जुन १ मा बर्खास्त गरिएको थियो ।
माार्टिनो मियामीको नयाँ प्रशिक्षक नियुक्त भएसँगै लियोनल मेस्सीसँग पुनर्मिलन हुने भएको छ ।
सात पटकका बालोन डीओर विजेता मेस्सी र मार्टिनोले यसअघि बार्सिलोना र अर्जेन्टिनाको राष्ट्रिय टोलीमा सँगै रहेका थिए ।
उनीहरुबीच तेस्रोपटक सहकार्य हुनेछ । मेस्सीले यसै गर्मीमा फ्रान्सेली क्लब पीएसजी छाड्दै मियामीमा सम्झौता गरेका थिए ।
सन् २०२२ को फिफा विश्वकपमा मार्टिनो मेक्सिकोको प्रशिक्षक थिए । मेक्सिको समूह चरणबाटै बाहिरिएपछि अर्जेन्टिनी मार्टिनोले आफ्नो पदबाट राजीनामा दिएका थिए ।
‘मार्टिनो एक उच्च सम्मानित व्यक्तित्व हुन् । उनको रेकर्ड आफैं बोल्छ’, इन्टर मियामीका सह मालिक डेभिड बेकह्यामले भने, ‘हामी विश्वस्त छौं कि उनको अनुभवले हाम्रो टोलीलाई प्रेरणा दिनेछ र हाम्रा फ्यानहरूलाई उत्साहित बनाउनेछ उनको प्रभाव हेर्न तत्पर छौं ।’
मार्टिनोले आफ्नो कामको कागजात प्राप्त गरेपछि कोचिङको जिम्मेवारी ग्रहण गर्नेछन् । मार्टिनोसँग अमेरिकी लिग सकर एमएलएसको अनुभव छ । २०१८ मा एट्लान्टा युनाइटेडलाई उनले एमएलएस कपको उपाधि दिलाएका थिए ।
प्रतिक्रिया 4