विष्णु सापकोटाको ‘अडिएका पाइला’ बारे मन्जुश्री थापा– ‘यो क्याम्पस उपन्यास हो’

काठमाडौं । सशक्त राजनीतिक विश्लेषण अनि प्राज्ञिक, दार्शनिक मीमांसामा अभ्यस्त रहने लेखक विष्णु सापकोटालाई नेपाली भाषाका पाठकले उपन्यासकारका रुपमा पनि पाएका छन् ।

काठमाडौंमा शनिबार सापकोटाको पहिलो उपन्यास ‘अडिएका पाइला’लाई प्रसिद्ध आख्यानकार मन्जुश्री थापाले विमोचन गरिन् ।

सापकोटाको लेखनबारे बोल्दै थापाले भनिन्, ‘विद्वान लेखकका रुपमा गम्भीर राजनीतिक तथा बौद्धिक विषयमा सिधा विचारहरु लेख्दै आउनुभएको विष्णुले किन उपन्यास विधा नै रोज्नुभयो होला भन्ने प्रश्न पनि मनमा आयो । तर क्याम्पस जीवनमा रहेका २० वर्ष नजिकका युवायुवतीको मनमा उठ्ने धरमर–धरमर भावनालाई यो किताबले राम्रोसँग चित्रण गरेको छ ।’

थापाले सापकोटासँग जीवनका अप्ठ्यारा भावनाहरुलाई राम्रो भाषामा लेख्नसक्ने क्षमता रहेको भन्दै प्रशंसा गरिन् । उनले विदेशी भाषाहरुमा क्याम्पस नोभल भन्ने विधा नै रहेको सुनाउँदै भनिन्, ‘नेपाली साहित्यमा क्याम्पस–नोभलहरुको कमी छ । अडिएका पाइलाले त्यो कमी पूरा गर्नेछ ।’

सापकोटाले आफ्नो दुई वर्षको मेहनत, अनि धेरै वर्षअघिदेखि भन्न बाँकी कथा अहिले उपन्यासका रुपमा आएको बताए । आफू कला साहित्यकै लागि धेरै वर्ष अध्ययनमा बिताए पनि बीचको समयमा भएको कमीसमेत पूरा गर्नेगरी उपन्यास लेख्न कोसिस गरेको उनले सुनाए ।

त्रिभुवन विश्वविद्यालयका एमए विद्यार्थीहरुलाई लामो समय अंग्रेजी साहित्य पढाएका सापकोटाले भने, ‘क्याम्पस जीवनमा रहेका पात्रहरुको मनमा उठ्ने सोचाइहरु, अनि उनीहरुको प्रेमको भावनासँगै देश र समाजमा घटित घटनाहरुले कसरी व्यक्तिहरुलाई प्रभावित पार्दोरहेछ भन्ने जिज्ञासासँगै पात्र निर्माण र उपन्यास लेखन चल्यो ।’

फाइनप्रिन्टले प्रकाशित गरेको ‘अडिएका पाइला’ उपन्यासमा अनसुया, अस्तित्व, वन्दना, मोहनजस्ता पात्रहरुबीचको वैचारिक घर्षणसँगै सम्बन्धको उतारचढावसमेत प्रकट छ । सापकोटाले आफ्नो किताबबारे अर्को प्रसंग पनि खोले, ‘उपन्यास लेख्न बस्छु भनेर कथाको खोजी गरेको होइन, लामो समयदेखि आफूभित्र बसिरहेको एउटा कथा थियो, त्यसैले मलाई यो किताबसम्म यात्रा गरायो ।’