‘शैतान’देखि ‘हीरामण्डी’सम्म : यो सप्ताहन्त ओटीटीमा के हेर्ने ?

काठमाडौं । यो साता ओटीटी प्लाटफर्ममा केही रोचक र फिल्म सिरिज आउँदैछन् । सञ्जयलीला भन्सालीको ओटीटी डेब्यु ‘हीरामण्डी’ मे १ मा नेटफ्लिक्समा आइसकेको छ ।

यो सप्ताहन्त सुपरन्याचुरल–थ्रिलर ‘शैतान’देखि सर्भाइभल–थ्रिलर ‘मञ्जुमेल ब्वाइज’सम्म सूचीमा छन् ।

अजय देवगण, ज्योतिका र आर माधवन स्टारर बलिउड फिल्म ‘शैतान’ केही महिनाअघि हलमा आइसकेको छ । नेपालमा समेत यसले उत्कृष्ट कमाइ गर्‍यो । हलमा हेर्न नपाएका दर्शकलाई ओटीटीमा हेर्ने सुविधा छ । विकास बहल निर्देशित ‘शैतान’ शनिबार नेटफ्लिक्समा आउँदैछ ।

‘मजुम्मेल ब्वाइज’ मलायमल सर्भाइभल–थ्रिलर फिल्म हो, जसलाई चिदम्बरमले लेखन तथा निर्देशन गरेका हुन् । फिल्ममा सौबिन शाहीर, श्रीनाथ भासी, बालु वर्गीस, गणपति एस पोडुवल लगायतको अभिनय छ । सन् २००६ को एक सत्य घटनामा आधारित फिल्मले कोची नजिकैको मन्जुम्मेल भन्ने सानो सहरका साथीको समूहको कथा भन्छ, जसले कोडैकनालमा छुट्टी मनाउने निर्णय गर्छन् ।

सञ्जयलीला भन्साली निर्देशित सिरिज ‘हीरामण्डी’ नेटफ्लिक्समा आइसकेको छ । कुल आठ एपिसोडको यो सिरिजले भारत–पाक स्वतन्त्रताअघिको लाहोरको एक थलो हीरामण्डीको कथा भन्छ । उक्त थलोका शाही यौनकर्मीको रवाफ र शक्तिको वरपर घुम्ने यो सिरिजमा मनिषा कोइराला, सोनाक्षी सिन्हा लगायतको प्रमुख भूमिका छ ।

‘द ब्रोकन न्युज सिजन २’ श्रृंखलालाई विनय वाइकुलले निर्देशन गरेका हुन् भने सम्बित मिश्राले लेखेका हुन् । यो सिरिज रिपोर्टिङको दुनियाँमा आधारित छ । नयाँ सिजनमा सोनाली बेन्द्रे, जयदीप अहलावत र श्रिया पिलगाउँकर क्रमशः अमीना कुरैशी, दीपंकर सान्याल र राधा भार्गवको भूमिकामा देखिनेछन् । यो सिरिज जी फाइभमा शुक्रबारदेखि स्ट्रिमिङ हुँदैछ ।

‘द आइडिया अफ यू’ रोमान्टिक कमेडी फिल्ममा  एनी ह्याथवेलाई ४० वर्षीया डिभोर्सी आमाको भूमिकामा प्रस्तुत गरिएको छ । कोचेला समारोहमा एक किशोर पपस्टारलाई भेटेपछि सुरु हुने सनसनीपूर्ण सम्बन्धको कथा यसमा छ ।

यो फिल्म रोबिन लीको सोही नामको उपन्यासमा आधारित छ । यसलाई ह्यारी स्टाइल्सको फ्यान फिक्सन कथाबाट प्रेरित रहेको बताइएको छ । यो फिल्म बिहीबार प्राइम भिडियोमा रिलिज भइसकेको छ ।

‘अ अटिपिकल फ्यामिली’ १२ एपिसोडको वेब सिरिज हो । यो सिरिज शनिबार नेटफ्लिक्समा रिलिज हुँदैछ । यसमा जाङ की योङ, चुन वु हे, गो डू शिम र क्लाउडिया किमले अभिनय गरेका छन् ।

नेटफ्लिक्समा यसको सारांशबारे लेखिएको छ– ‘अद्वितीय महाशक्ति प्राप्त गरेको एउटा परिवारले आधुनिक दिनका समस्याको कारण आफ्नो क्षमता गुमाउँछ जबसम्म एक रहस्यमयी महिलाले सबथोक परिवर्तन गर्दिनन् ।’