‘खुस्मा’को टिजर : सशस्त्र युद्धको पृष्ठभूमिमा अंकुराएको प्रेमकथा

काठमाडौं । अभिनेता धीरज मगर र अभिनेत्री उपासना सिंह ठकुरीको शीर्ष भूमिका रहेको फिल्म ‘खुस्मा’को टिजर सार्वजनिक भएको छ । २ मिनेट २४ सेकेण्डको टिजरले यी दुई पात्रको प्रेम सम्बन्ध र सशस्त्र द्वन्द्वले गाउँमा पारेको प्रभाव चित्रण छ ।

मगर समुदायको परिवेशमा निर्माण भएको प्रेमकथामा आधारित फिल्मले दशक लामो सशस्त्र द्वन्द्वको पृष्ठभूमिमा अंकुराएको प्रेम कथा भन्छ । फिल्ममा धीरज र उपासनाले प्रेमी-प्रेमिकाको भूमिका निर्वाह गरेका छन् ।

फिल्ममा कर्णालीको मनोहर प्राकृतिक सौन्दर्यलाई चित्रण गरिएको छ । यसअघि अन्तर्राष्ट्रिय फेस्टिभलमा अवार्ड जितेका थुप्रै छोटा फिल्म निर्देशन गरेका अशोक थापा मगरको यो डेब्यु फिचर हो ।

फिल्ममा माओत्से गुरुङ, खड्कबहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुण मगर, सारा राई, श्वेता मिश्र, विवेश मगर लगायत कलाकारको अभिनय छ ।

निर्मातामा वीरबहादुर लामा, चन्द्रबहादुर भट्टजन र बेतान मगर छन् । सहनिर्मातामा मानबहादुर धनाह मगर र सुस्मिता बुढाथोकी छन् । मोहन राई कार्यकारी निर्माता रहेको सिनेमामा दीपक बज्राचार्यको छायांकन छ ।

एसडी योगी र छान्जु पार्क (कोरियन)को संगीत, सुरेन्द्र राना, राम अविरल बिष्ट र निर्देशक थापा मगरको गीत रचना रहेको फिल्मको वितरण गोविन्द शाहीको काफिया फिल्म्सले गर्नेछ ।

‘खुस्मा’ संविधान दिवसको सन्दर्भमा असोज ३ गते प्रदर्शन हुँदैछ ।