कार्ल्सबर्ग ग्रुपले १ खर्बमा किन्यो सीपी खेतानको ३३ प्रतिशत सेयर

१४ मंसिर, काठमाडौं । डेनमार्कको कार्ल्सबर्ग ग्रुपले साउथ एसिया पीटीई लिमिटेडमा रहेको सीएसएपीएल (सिंगापुर) होल्डिङ पीटीई लिमिटेडको बाँकी ३३.३३ प्रतिशत सेयर खरिद गरेको छ ।

सीएसएपीएल (सिंगापुर) मा रहेको उक्त सेयर नेपाली व्यवसायी सीपी खेतानको स्वामित्वमा थियो । उनले १ खर्ब रुपैयाँ बराबरमा उक्त सेयर कार्ल्सबर्र्ग ग्रुपलाई बेचेका हुन् ।

यो नेपालको इतिहासमै कम्पनीको सेयर किनबेच मध्येको एक ठूलो ‘डिल’ भएको छ ।

खेतान ग्रुपका सीपीले मदिरा उत्पादक कम्पनी कार्ल्सबर्गलाई गोरखा ब्रुअरी प्रालिको पूरै सेयर स्वामित्व बेच्न गत वर्ष उक्त रकम प्रस्ताव गरेका थिए ।

सोही प्रस्ताव मान्दै कार्ल्सबर्र्गले सीपीको नाममा रहेको सेयर खरिद गरेको हो । करिब ७४ करोड ४० लाख अमेरिकी डलरमा उक्त सेयर बेच्ने प्रस्ताव भएको थियो ।

नेपालको गोरखा ब्रुअरीमा खेतान ग्रुपका अध्यक्ष रहेका राजेन्द्र खेतानको ०.०६ प्रतिशत सेयर छ । त्यसबाहेक ९९.९४ प्रतिशत सेयर सीएसएपीएल (सिंगापुर) सँग छ ।

सीएसएपीएलमा गैरआवासीय नेपाली सीपी खेतान स्वामित्वको एसएपीएल होल्डिङ्स पीटीई लिमिटेड (सीएसएपीएलएच) को ३३.३३ प्रतिशत सेयर थियो ।

अब गोरखा ब्रुअरीमा सीएसएपीएलएच मार्फत अन्तरनिहीत रहेको खेतान समूहको ३३.३३ प्रतिशत र कार्ल्सबर्ग इन्डियामा रहेको ३३.३३ प्रतिशत सेयर दुवै कार्ल्सबर्र्ग डेनमार्क अन्तर्गतको सीएसएपीएलको भएको छ ।

त्यस अनुसार गोरखा ब्रुअरीमा ९९.९४ प्रतिशत र कार्ल्सबर्र्ग इन्डियामा शतप्रतिशत सेयर कार्ल्सबर्र्ग ग्रुपकै स्वामित्वमा गएको छ । यसले यी दुवै कम्पनीका व्यवस्थापन र निर्णायक तहमा कार्ल्सबर्ग नै रहने छ ।

केही समयअघि कार्ल्सबर्ग र खेतान ग्रुपबीच गोरखा ब्रुअरीको व्यवस्थापन नेतृत्व कसले गर्ने भन्ने विवाद थियो । त्यसैकारण सिंगापुरको मध्यस्थता न्यायाधीकरण (आर्बिट्रेसन) मा विवाद समाधानका लागि मुद्दा पुगेको थियो । न्यायाधीकरणले कार्ल्सबर्र्गलाई सीएसएपीएलमा खेतान ग्रुपको सेयर कल गर्ने अधिकार दिएको थियो ।

त्यसका आधारमा भएको स्वतन्त्र मूल्यांकनमा कम्पनीको सीएसएपीएलमा रहेको सीपी खोतान स्वामित्वको सीएसएपीएलएचको सेयर मूल्य ७४ करोड ४० लाख डलर बराबर ठहर भएको थियो । त्यसकै आधारमा सीएसएपीएलएचले सेयर बेच्न प्रस्ताव गरेको थियो ।