+
+

टायल उद्योगमा १५ अर्ब लगानी, २ हजारलाई रोजगारी

नेपालमै उत्पादन हुन्छन् ६५ प्रतिशत टायल

नेपालमा टायल माग प्रतिमहिना २५ लाख वर्गमिटरसम्म पुगेकोमा नेपाली उद्योगको क्षमता १५ देखि १८ लाख वर्गमिटर छ । त्यसबाहेकको टायल मुख्य रूपमा भारतबाट आयात हुन्छ ।

अनलाइनखबर अनलाइनखबर
२०८१ मंसिर २१ गते १७:१७

२१ मंसिर, काठमाडौं । बाथरुम, भान्सा तथा भुइँ (फ्लोर) लगायतमा प्रयोग हुने टायलमा नेपाल आत्मनिर्भर हुने दिशामा अगाडि छ ।

पछिल्लो चार वर्ष अवधिमै नेपालमा ६ ठूला टायल उद्योग खुलेका छन् । यी उद्योगले कुल टायल मागको ६५ प्रतिशत हिस्सा ओगटेको नेपालमा कजरिया टायल उत्पादन गरिरहेको कजरिया रमेश टायल्स लिमिटेडका सञ्चालक रोहित गुप्ताले बताए ।

एउटा टायल उद्योगमा कम्तीमा २ अर्बदेखि बढीमा ४ अर्बसम्म लगानी भएको गुप्ता बताउँछन् । टायल उद्योगको लगानीलाई औसत साढे २ अर्बका दरले हिसाब गर्दा यी उद्योगहरुमा कुल १५ अर्ब रुपैयाँ लगानी भएको गुप्ता बताउँछन् ।

एउटा टायल उद्योगले २ सय ५० देखि ४ सय जनासम्मलाई रोजगारी दिन्छन् । यस हिसाबले टायल उद्योगमा २ हजार जनाले रोजगारी पाएका छन् ।

नेपालका ६ ठूला टायल उद्योगको कुल क्षमता प्रतिदिन ५० देखि ६० हजार वर्गमिटर रहेको उनले बताए ।

रमेश कर्प अन्तर्गत कजरिया रमेश टायल्स लिमिटेडले भारतको चर्चित ब्रान्ड ‘कजरिया’ का टायल नेपालमा उत्पादन गरिरहेको छ ।

भारतको नम्बर एक तथा विश्वको सातौं ठूलो कजरियासँग रमेश कर्पले बराबरी लगानीमा टायल उद्योग खोलेको हो । ४ अर्ब रुपैयाँ लगाानी भएको उद्योग नवलपरासीमा छ ।

‘हाम्रो कजरिया टायल उद्योगको उत्पादन क्षमता १५ हजार वर्गमिटर प्रतिदिन हो, सबै उद्योग एउटै क्षमतामा छैनन्, त्यसो हुँदा ५० देखि ६० हजार वर्गमिटर टायल हरेक दिन नेपालमा उत्पादन हुन्छ,’ गुप्ताले भने ।

नेपालमा उत्पादित टायल भारतबाट ल्याउँदा भन्दा ३० प्रतिशतसम्म सस्तो पर्ने उनले बताए ।

लुमिनार टायल उद्योग ।

नेपालमा टायल माग प्रतिमहिना २५ लाख वर्गमिटरसम्म पुगेकोमा नेपाली उद्योगको क्षमता १५ देखि १८ लाख वर्गमिटर रहेको उनले बताए । त्यसबाहेकको टायल मुख्य रूपमा भारतबाट आयात हुन्छ ।

अहिले निर्माण क्षेत्रमा सुस्तता आएकाले टायल माग पनि तीव्र रूपमा घटेको उनको भनाइ छ ।

नेपालमा कोभिडपछि टायल कारखाना खुल्न थाले पनि यिनको विस्तार भने तीव्र छ । नेपालमा कजरियाका अतिरिक्त नेपोभिट, नेमाटो, प्राइम, लुमिनार ब्रान्डमा टायल उत्पादन भइरहेका छन् ।

बारा जितपुरस्थित नेपाल सेरामिकले ‘नेपोभिट’ ब्रान्डमा टायल उत्पादन गर्छ । २०७९ मा मनोज रौनियार र शम्भुनाथ झा मिलेर स्थापना गरेको उद्योगमा १ अर्ब ६० करोड लगानी भएको छ ।

त्यस्तै, लुम्बिनी सेरामिक उद्योगले हालै बर्दिया गुलरियामा टायल उत्पादन सुरु गरेको छ । मंगलम ग्रुपको लगानीको उद्योगमा ३ अर्ब रुपैयाँ लगानी भएको छ । साढे १२ बिघा क्षेत्रफलमा फैलिएको उद्योगको क्षमता ४ करोड १५ लाख वर्गफिट रहेको उद्योगले जनाएको छ । यो उद्योगले ५ सय डिजाइनका टायल उत्पादन गर्छ । उद्योगले ३ सयलाई रोजगारी दिने जनाएको छ ।

त्यस्तै प्राइम सेरामिक्स प्रालिले पनि गत वर्ष असारदेखि टायल उत्पादन थालेको थियो ।

प्राइम टायल उद्योग ।

रौतहट बृन्दावन नगरपालिकामा १० बिघा क्षेत्रफलमा फैलिएको टायल उद्योगमा २ अर्ब रुपैयाँ लगानी भएको छ ।

सीएमएस ग्रुप र फर्चुन भेन्चर्सको लगानीमा खुलेको उद्योगको दैनिक उत्पादन क्षमता करिब १४ हजार वर्गमिटर छ । उद्योगले ३ सय जनालाई रोजगारी दिएको जनाएको छ ।

बारा सिमराको विशेष आर्थिक क्षेत्रमा स्थापित पशुपति सेरामिक्स उद्योगले पनि टाइल उत्पादन सुरु गरेको छ । उद्योगमा करिब डेढ अर्ब लगानी भएको छ ।

अरिहन्त ग्रुपको ३ अर्ब लगानीमा सुनसरी सोनापुरमा नेमाटो ब्रान्डको टायल उत्पादन दुई महिनाअघि मात्रै सुरु भएको छ ।

दैनिक १८ हजार वर्गमिटर टायल उत्पादन क्षमताको उद्योगले आफूलाई नेपालकै सबैभन्दा ठूलो टायल उत्पादक भएको दाबी गरेको छ ।

त्यस्तै नेपाल उद्योग वाणिज्य महासंघका पूर्वअध्यक्ष पशुपति मुरारकाले चर्चित सोमानी टायल नेपालमै उत्पादन गर्ने योजना बनाएका छन् । यो उद्योगले आगामी वर्षबाट उत्पादन सुरु गर्ने योजना रहेको उद्योगको दैनिक उत्पादन क्षमता करिब ९ हजार वर्गमिटर हुने जनाइएको छ ।

सिमेन्ट उद्योगकै बाटोमा टायल उत्पादन

सिमेन्ट उद्योगमा जस्तै टायल उद्योगमा पनि बिस्तारै स्वदेशी कच्चापदार्थ प्रयोग बढ्दै जाने रमेश कर्पका उपाध्यक्ष समेत रहेका गुप्ता बताउँछन् ।

‘नेपालमै उत्पादित टायलले अब आयात विस्थापन गर्न थालिसकेको छ,’ गुप्ताले भने, ‘बिस्तारै नेपाली कच्चापदार्थको प्रयोग पनि बढ्ने छ ।’

अहिले ठूला आकार र नेपालमा नबन्ने डिजाइनका टायल मात्रै आयात भइरहेको उनी बताउँछन् ।

टायलको कच्चापदार्थ माटो नै हो । विभिन्न ८ देखि १० प्रकारका माटो टायल उत्पादनमा प्रयोग हुने गर्छ ।

त्यसमध्ये ७० प्रतिशतसम्म माटो नेपालकै प्रयोग गर्न सकिने देखिएको पनि उनले बताए । ‘सिमेन्ट उद्योगमा नेपालको चुनढुंगा प्रयोग भएजस्तै अर्को दुई वर्षमा टायल उद्योगमा पनि नेपाली माटोकै प्रयोग बढ्ने छ,’ उनले भने ।

नेपोभिट उद्योगले नेपालकै माटोबाट पनि टायल उत्पादन गरिरहेको जनाएको छ । भारतीयको तुलनामा नेपाली माटोबाट बनेको टायल बलियो देखिएको उसको भनाइ छ । त्यसो हुँदा आगामी दिनमा नेपाली माटोबाट बनेका टायलले बजार लिनेछन् ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?