नेपाल–भारत सम्बन्ध दृढ छ, कुनै विषयले असर गर्दैन : चौथाइवाले

१७ वैशाख, काठमाडौं । भारतीय जनता पार्टी (भाजपा) को विदेश विभाग इन्चार्ज डा. विजय चौथाइवालेले नेपाल–भारत सम्बन्ध दृढ रहेको र यसलाई कुनै विषयले असर नपर्ने बताएका छन् ।

बुधबार गृहमन्त्री रमेश लेखकसँगको भेटमा चौथाइवालेले यस्तो बताएका हुन् ।

‘नेपाल–भारतबीचको सम्बबन्ध दृढ छ,’ गृहमन्त्री लेखकको सचिवालयका अनुसार चौथाइवालेले अगाडि भनेका छन्, ‘कुनै पनि विषयले मित्रवत सम्बन्धमा असर पर्दैन ।’

यो पनि पढ्नुहोस

भाजपा विदेश विभाग प्रमुख चौथाइवाले काठमाडौंमा

चौथाइवालेले दुई देश बीचको सम्बन्ध थप सुदृढ गर्दै लैजाने विश्वास र प्रतिबद्धता समेत व्यक्त गरेका छन् । साथै, चौथाइवालेले नेपालको लोकतन्त्र सुदृढीकरणमा भारतीय जनता पार्टीको पूर्ण सहयोग रहने पनि बताए ।

भेटमा गृहमन्त्री लेखकले भारतको जम्मु–कश्मिरमा भएको आक्रमणको निन्दा गरे ।

मन्त्री लेखकले उक्त घटना दुखद् भएको बताउँदै आतंकवादी हमलाविरुद्धको घटनामा नेपाल सरकार छिमेकीमित्र भारतसित रहेको बताएका छन् ।