मधेशका वनमन्त्रीको राजीनामा माग्दै वनजंगल संरक्षण अभियानले बुझायो ज्ञापनपत्र

२१ वैशाख, जनकपुरधाम । चुरे तथा वनजंगल संरक्षण अभियान नेपालले वनमन्त्रीको राजीनामा माग्दै मधेश सरकारलाई ज्ञापनपत्र बुझाएको छ ।

अभियानका संयोजक सुनिल यादवले वनमन्त्री त्रिभुवन साहको राजीनामा सहितको तीन सूत्रीय माग गर्दै मुख्यमन्त्री तथा मन्त्रिपरिषद् कार्यालयका कानुन सचिव राजन नेपाल मार्फत सरकारलाई ज्ञानपत्र बुझाएका हुन् ।

चुरे संरक्षणमा असफल भएका वनमन्त्री त्रिभुवन साहको राजीनामा र सचिव उद्धव घिमिरेको प्रदेशबाट बिदाइ गर्नुपर्ने, तस्करसँग मिलेमतोमा वन फडानी गरिरहेको भन्दै रौतहटका डिभिजन प्रमुख हेमन्त साहलाई तत्काल प्रदेशमा झिकाइ हालसम्मका कार्यहरूको स्पष्टीकरण माग गर्न र गैंडाटारको वन फडानीको विषयमा उच्चस्तरीय छानबिन समिति गठन गर्नुपर्ने माग अभियानको छ ।

यस्तै चुरे क्षेत्र, खोला, नदी, नालामा भइरहेको अवैध उत्खनन, वन फडानी, चोरी निकासी तथा अतिक्रमण तत्काल रोक्न कडाइका साथ कार्यान्वयन गर्न अभियानले माग गरेको छ ।

अभियानका संयोजक यादवले रौतहट डिभिजन वन कार्यालयका प्रमुख हेमन्त साहसहित केही वन कर्मचारी र तस्करबीचको मिलेमतोमा चुरे क्षेत्रको अवैध दोहन भइरहेको आरोप समेत लगाएका छन् ।

मागहरू कार्यान्वयन नभए आन्दोलन थाल्ने अभियानले जनाएको छ ।