इप्पानलाई धितोपत्र बोर्डको पत्र : आरोपको तथ्यगत प्रमाण पठाऊ

News Summary

Generated by OK AI. Editorially reviewed.

नेपाल धितोपत्र बोर्डले आईपीओ स्वीकृतिका लागि रकम असुल गरेको आरोपबारे आधिकारिक प्रमाण माग गरेको छ।
बोर्डले आरोपको पुष्टि भएमा कानुनी कारबाही प्रक्रिया अघि बढाउने जनाएको छ।
यसअघि, आईपीओ स्वीकृतिका लागि रकम मागिएको भन्ने गुनासो अख्तियारमा परेको थियो।

३१ वैशाख, काठमाडौं । नेपाल धितोपत्र बोर्डले आईपीओ स्वीकृतिका लागि रकम असुल गरेको आरोपबारे तथ्यगत प्रमाण र आधिकारिक धारणा पेश गर्न ऊर्जा उत्पादकहरुको संस्था इप्पानलाई आग्रह गरेको छ ।

बोर्डले नै निर्णय गरेर इप्पानलाई पठाएको औपचारिक पत्रमा कमिसन असुलका लागि बोर्डका कोही व्यक्तिमार्फत प्रयास गरिएको आरोपबारे तथ्यगत प्रमाण पठाउन भनिएको छ ।

इप्पानले पठाएको तथ्यगत प्रमाण र आधिकारिक धारणापछि संलग्नलाई सोही बमोजिम कानुनी कारबाहीको प्रक्रिया अघि बढाइने बोर्डले जनाएको छ ।

यसअघि आईपीओ स्वीकृतिका लागि बोर्डका अध्यक्ष सन्तोषनारायण श्रेष्ठको नाम लिँदै कसैले कमिसन लिन खोजेको भन्दै अख्तियारमा गुनासो परेको थियो । सोही गुनासोका आधारमा अख्तियारको एउटा प्रतिनिधि टोलीले बोर्डसँग यसबारे औपचारिक जानकारी समेत लिइसकेको छ ।

बोर्डले अख्तियारलाई आईपीओ पाइपलाइनमा रहेका प्रत्येक कम्पनीको पछिल्लो प्रगति स्थितिबारे जानकारी गराइसकेको छ । आईपीओ स्वीकृतिका लागि कुल रकमको ५ प्रतिशत कमिसन बुझाउनुपर्ने भन्दै पाइपलाइनका कम्पनीहरुसँग बोर्ड अध्यक्षकै नाम जोडेर रकम माग गरिएको आरोप लागेको छ ।