सिमान्तकृत वर्गसम्म पुग्नेगरी बजेट ल्याउन सांसद साउदको सुझाव

News Summary

Generated by OK AI. Editorially reviewed.

नेपाली कांग्रेसका सांसद नारायणप्रकाश साउदले बजेट निर्माण गर्दा सिमान्तकृत वर्गसम्म विकासको लाभ पुग्ने गरी ध्यान दिन आग्रह गरेका छन्।
उनीले असन्तुलित विकास र प्रभावशाली वर्गको हितमा हुने बजेटलाई सुधार गर्न सरकारलाई सुझाव दिएका छन्।
साउदले सामाजिक न्याय र विकासको प्रतिफल सबै वर्गसम्म पुग्ने गरी बजेट बनाउने आवश्यकतामा जोड दिएका छन्।

४ जेठ, काठमाडौं । नेपाली कांग्रेसका सांसद नारायणप्रकाश साउदले विकासको प्रतिफल सिमान्तकृत वर्गसम्म पुग्नेगरी बजेटको निर्माण गर्न सरकारसँग आग्रह गरेका छन् ।

आइतबार प्रतिनिधि सभाको बैठकमा बोल्दै उनले हरेक वर्ष बजेट आउने गरेको र यस वर्ष पनि बजेटको पूर्वसन्ध्यामा रहेको बताए ।

‘हरेक वर्ष बजेट आउने गरेको छ । यस वर्ष पनि बजेटको पूर्वसन्ध्यामा आएका छौँ । बजेटको सिद्धान्त र प्राथमिकता सरकारले नै निर्धारण गरेको होला । नीति तथा कार्यक्रममा छलफल भएको छ,’ साउदले भने, ‘नेपालमा असन्तुलित विकास र प्रभावशालीहरुले बजेटमा हाली मुहाली गर्ने कुरामा लामो समयदेखि विवाद हुँदै आएको छ । शहर र गाउँ, सुगम र दुर्गम, भूगोल र जनसंख्या तथा सशक्त आवाज भएका अभिजात्य वर्ग र आवाजविहीनहरूको हितको अन्तरविरोधलाई अनुभवी अर्थमन्त्रीले संयोजन र सम्बोधन कसरी गर्नुहुन्छ ?’

विगतमा भएका अनुभव र विद्रोहबाट पाठ सिक्दै सामाजिक न्याय र विकासको प्रतिफल सिमान्तकृत वर्गसम्म पुग्नेगरी बजेटको निर्माणका लागि उनले सरकारलाई सुझाव दिए ।